مزگانی چەوەڕی نەكریایە گەوراگەی گۆڤار ''فەیلی''
عەلی حسێن فەیلی/ وەرجەیە بچمە ناو باوەت دەرچگن ژمارەی ٢٠٠ لە گۆڤار ''فەیلی''، ک خوەی رێکەفت فرە خوەشیگە، بایەسە مینەی وەڵام ئەو پرسیارە بکەیمن، ک باس لە گرنگی باسکردن لە باوەت فەیلیەگان کەێد، وەتایبەت لە راگەیانن و گرنگیە رکدارەگەی لە رەوش ئیسە! هەرچەن رەوش پەیوەندیدارە وەی باوەتە دادگه‌ری له تی نیه و وەڵامەگەی دریژە؛ بەڵکم بوین ومەنین گۆڤاریگ جوور ئەیە خوەی نشانه‌ی تەقەلایگە ئەرا چگن وه‌ره‌و رەوشیگ ئاسایی، وگونجیاگ وەل خواستمان له راگەیانن، وهاوبەشیمان له نشانداین شیوە راسیەگەی گرفت ئی چینە.
ژمارەی ئەو ناوەند ودامەزراوەیلە ک گرنگی وەی باوەتە دانە وکار ئەرای کردنه فرە نییە، ک بوین و نەوینیان بوودە شوون قسەوباس! کار گۆڤار '' فەیلی'' هاوشیوەی خەبات سیاسی نیە ک لە وەرینەو برادەر ودوژمن ئەرای هەس. ئی کارە خوەی هونەر نشانداین ئەو باوەتەیلەسە ک باس لە باوەتیگ یاسایی و شناسنامەی چین رەسەنیگ کەێد ك هەمیشە وەردەوامی لە نووەوکردن خوازێد تا بوودە سەرچەویگ ئەرشیفی زینگ.
مه‌ینه‌تیه‌یل کورد فەیلی وەگەرد هاتن سەدام دەسنەکردەپی، ونەیش وەگەرد چگنی کۆتایی وه پی نه‌هات . واتە ئی مه‌ینه‌ت بەشیه لە عراق وەردەوامە، هەرچەن لە سەردەم بەعس زیانەگە رەسیە لووتگەگەی. ئیسە وەردەوامی عراقیەگان لە زیان جەنگ نەتەوەگەری ، مەزهەبی وسیاسی و... ئەو رەوش تاڵە شیەوکەێد ک ئه‌را گشت هانه ناو دوزەق.
لە قۆناغ بەعس رەد کردیمن و قوناغ دویای بەعس کەفتە دەسمان، ک خوەی قۆناغ دەرفەته‌یله ئەرا وەدەسهاوردن بەشیگ لە قانجاز و نەهامەتیەگان. ئینسان فەیلی جوور ئەو چینەگان هاوبەشه لە میراتی نەهامەتیەگان ک هاووڵاتیەیل تووشی هاتنه. ئەزمون کار وژیان لەی وڵاتە ئەرامان ئووشن ک هەرچەن عراق هالە ژیر كارگه‌ری ئەگەرەیل ناودەوڵەتی، و لە ناو گیژاو ململانەیل کۆمەڵایەتی و رووشنهویری و سیاسی ری کەێد ک پڕن لە کیشمەکیش، هه‌میش زانیمین ك چارەنووسمان هه‌ر لەناوخۆ دیاری کریەێد نەگ لە ده‌یشت وڵات.
ژیانه‌گه‌ی گۆڤار ''فەیلی'' لە تەرازوی ئەوانەگ خوازن بنووڕنە جهان دەیشت کار گرنگیگە و گرنگی خوەی دیرێد چوونکە گشت ئەو کارەیلە ک ده‌زگایه‌یل راگەیانن لە دویای رمانن سەدام و لەباوەت کورد فەیلی ئەنجامی دان، ئەرای نەکریا وەیجوورە وەردەوام بوود، جوور ئەوەگ تەمەن دریژی گۆڤارەگە ئی راسیە چەسپان.
هه‌ركی هه‌رچی خوازێ بویشێ!، دووسەد ژمارە لە گۆڤاریگ پڕ لە هەزاران رستە و ووشەی گران و دەیان باوەت سووددار، مزگانییگ گه‌ورایگه ئەرا ئەوانەیگ مینەی ناسین دەسکەفت و ئەزمون سەرکەفتگیگ کەن لە کار و چالاکی فەیلیەگان.
وەردەوامی ژیان گۆڤاریگ وەزوان عەرەوی و لە دەیشت کوردستان، وە گشتی باس کورد زینگه‌و كه‌ی ، ئمجا باس فەیلیەیله وه تایبەت. کار پیشەیی ئەوەسە کەلتور و بنیاد فه‌رهه‌نگێگ هاوچەرخ داشتوید. لە مەیدان ئی گۆڤارە ده‌رفه‌تێگ هه‌س تا وه قویلی باوەتەیل کوردی و مه‌سه‌له‌ی كورد فه‌یلی و مله‌ت كورد بوینن و بخوه‌نن.
دویای رەدبوین نزیك بیست ساڵ، ئەو راسیە نێشاریەێدەو ک ئووشێد؛ فرە نیین ئەوانەگ وە ئاشکرایی و وەگشت توانایان هانمان دان ، تا گۆڤارەگە هێز و ئومید لە کەلتور گەلەگەمان وەربگرێد و کەم نین ئەوانەگ لە وەخت كار هاوڕێ مه‌عنه‌ویمان بوین و زانن ئی رەنجەیلە و ئی كوششه‌یله لە رەوشەیلیگ سروشتی پەیا نەوین، بەڵکم ئیمە رەنج دایمن و زیان دیمن تا ئی كار ته‌مه‌ن دریژه سه‌قام بگرێ.
لە ئمڕووه‌و دویا ، ئومیدخوازیمن گشت بوونە خەمخوەری و مقەیەتی ئەو رووشنهویری وکەلتورە بوودە ئەرک گشت لایگمان. سوپاس ئەرا ئەو کەسیلە ک بەشداربوین لەی پڕۆژەی پیرووز و گرنگە، و گۆڤار فەیلی رەساننە ژمارەی ٢٠٠.
