فه‌يليه‌يل له ناونى راسى و خه‌ياڵ
شه‌فه‌ق نيوز/ گشت ره‌خنه‌گره‌يل له كار و ئه‌جنداێ ريكخرياگه‌يل تايبه‌ت وه كورده‌يل فه‌يلى و ئه‌وانه‌گ تومه‌تباريان وه له‌ده‌سداين متمانه ئه‌كه‌ن، بايه‌سه دگان وه ئه‌وه بنه‌ن ك دريغى ته‌نيا يه‌ك لايه‌ن ناگرێده‌و، به‌ڵكوو مه‌ردمانيگ هه‌ن كاره‌يل خاس ئه‌نجام دانه‌و شكه‌سته نه‌وينه‌و وه ئه‌وه‌گ ئى رايه هه‌ڵه له‌تى وجوود ديرێد.
ئاشكراسه ك دامه‌زرانن زوورم ئى ريكخريتگه‌يله چنه‌و ئه‌را قوناغ دوياى رميان رژيم به‌عس، ك وه تونى و گورجى په‌يمانه‌ييگه‌و جيگير بوين ك هه‌رچه‌نى هه‌ڵه‌په‌ڵه‌يش بوى له دامه‌زرانن و له ئنهيار ئى ريكخرياگه‌يله وه‌ل ئه‌وه‌يشا ئسپات ئه‌كا ك گرفته‌يل و سه‌ختيه‌يل فكرى و ئنسانى فريه‌يگ هه‌ن، له هه‌مان وه‌خت ئه‌تويه‌نيم بويشيم بيجگه ئه‌وانه‌گ هانه ده‌يشت وڵات، زوورم فه‌يليه‌يليش نيشته‌جى ئيران و عراق و هه‌رێم كوردستانن، ئاشكرايشه ك هويچ ريكخرياگه‌يليگ له ئيران نه‌يرن و خاڵ هاوبه‌ش له‌وه‌گ وجوود ديريد له عراق و هه‌رێم كوردستان ئه‌وه‌سه ته‌مويلى زاتيه‌و هويچ به‌خشينه‌يگيش وه‌رناگرێد!!
وه باوه‌ڕم له باره‌ێ مه‌سه‌له‌ى بارودوخ ئيسه‌مان، كيشه‌ى يه‌كه‌م ئه‌وه‌سه ك ديد خود كورده‌يل فه‌يلى ئه‌را ئى ريكخرياگه‌يله، ئه‌و ديده‌سه ك سويڕ خوه‌ێد له چوارده‌ور ره‌شبينى و نه‌وين متمانه، ئى نوڕستنيشه حه‌سر نيه له پيكهاته يا چينيگ تايبه‌ت كۆمه‌ڵايه‌تى، به‌ڵكوو ديارده‌يگه‌و گشتلايگ ئه‌گرێده‌و.
مه‌سه‌له‌ێ دويه‌ميش، ئه‌و ئه‌قڵيه‌ت كويه‌ن ئه‌را ئداره‌كردن هيمان وه‌رده‌وامه ك وستيه‌يگ نازانيد و گشت كاريگ ته‌ني حه‌سر له‌ناونى دو ڕه‌نگ چه‌رمگ يا سيه كرياگه!! ته‌حه‌زوب و سه‌روه‌خوه‌يى كفريگ نيه، به‌ڵكوو شيوازيگ سه‌رده‌ميانه‌و ديموكراسيه ك جى داخه نادێده ئيمانيگ له‌لاى مه‌ردم، فريه‌جاريش ئه‌وانه‌گ كار ريكخرياگى ئه‌كه‌ن وه پرووژه‌يل كه‌موكوڕيدار تاريف ئه‌كريه‌ن! له‌ڕاسى ريگخرياگه‌يل كورد فه‌يلى له به‌غدا و هه‌ولێر و ته‌نانه‌ت له ده‌يشتيش گشتيان يه‌ك ئامانج ديرن، وه‌لێ ئاساييه شيواز كاره‌يليان جياوازه! وه‌ل ئه‌وه‌يشا زوورم ئه‌وانه‌گ كار له‌و ريكخرياگه‌يله ئه‌كه‌ن مه‌يل ئه‌را ئه‌زموون لايه‌ن تر له وتار و باوه‌ڕ و كاره‌يل نه‌يرن و نازانن ك ته‌مه‌ن وه ته‌نيا مه‌رج نيه ئه‌را كار ريكخرياگێ!.
سێيه‌مين كيشه‌يلمانيش ده‌خاڵه‌ت راسه‌وخۆ و ناڕاسه‌وخۆس ئه‌را سياسه‌ت و وجوود كه‌سه‌يليگ ك ويرانكارى ئه‌كه‌ن! ئمجا هه‌ميشه كه‌سه‌يليگ هه‌ن كاريام ته‌شهير و كردن تومه‌ته و بنگه‌و په‌يوه‌نديه‌يليان وه‌ل لايه‌نه‌يليگ ته‌سخير ئه‌كه‌ن له چه‌سپانن هه‌وڵ مه‌ردم و ئاشكرايشه ك هه‌ركه‌سيگ متمانه وه ئه‌وانه ديرێد هه‌ر له گوزه‌يشته مينيد و به‌خت له ئاينده نه‌يريد.
كيشه‌ێ چواره‌ممانيش له ڕى په‌ڕينه‌وه‌ى ئه‌و بارودوخه‌سه ك له‌تى ژيه‌يم، ك ئه‌ويش فه‌قيرى و خراوى فكره‌وكردنه له‌لاى زوورممان، ئمجا لويتبه‌رزى و ته‌حقير و ئشق مقه‌يه‌تيكردن دويرمانه‌و ئه‌خا له هويره‌وكردن و په‌يوه‌ندى. ئه‌زموونه‌يليش ئه‌وه ده‌رخستن ك فراوانبيون و خوه‌شهاتن له زاڵبوين يه‌كيگه له هووكاره‌يل سه‌ره‌كى له لاره‌وبوين كار ريكخرياگى فه‌يلى و خوه‌ى له حه‌ساسيه‌ت و ويرانكارى سياسى و كۆمه‌ڵايه‌تى خوه‌ێ ده‌رخه‌ێد، ئى كاريشه زه‌ره‌د و خه‌رج فريه‌يگ خسته‌وه‌و بويه هووكار ويرانكرن ريڕه‌و په‌يوه‌نديه‌يل و دوياخريش نه‌وين متمانه‌و باوه‌ڕ مه‌ردميش جوور پيكهاته‌ێ فه‌يلى بويه هووكار له‌ده‌سداين سه‌رمايه‌ێ مێژووييمان.
ئى خاڵه‌يله‌و خاڵه‌يل تريش وجوود ديرن، وه‌لێ ئه‌وه‌گ له‌يرا زياى ئه‌كه‌م ئه‌ڕاى، ئه‌را نموونه ك باس له ريكخرياگه‌يل ئيسه كرديم، بايه‌سه مه‌زه‌نه‌ێ به‌رنامه‌يل كار بكه‌يم له چه‌وديرى ئاست رووشنهويرى و پابه‌ندى چالاكوانه‌يل و شيواز و چوينێتى نوێنه‌رايه‌تى و تاريفكردن كيشه‌گه‌مان وه‌گووره‌ى هه‌ڵكه‌فت ژينگه‌گه‌مان و شيواز مامڵه‌كردن وه‌ل مه‌ردم له شيواز وه‌ڕيخستن كار و پالاكيه‌يل وه‌گووره‌ى توانا.
ئاشكرايشه ك ريكخرياگه‌يليگيش هه‌ن ئه‌زموون خاس پيشكه‌ش كردن ك وه‌لاى كه‌مه‌و ئه‌و كاره‌يله ك تائيسه ئه‌نجامى دانه له به‌رژه‌وه‌ندى پيكهاته‌گه بويه‌و ئه‌و بواره‌يليشه ك هه‌ڵيانوژانگه ك هه‌رچه‌نى كه‌ميش بوينه، وه‌لێ دڵخوه‌شكه‌ر و كاريگه‌ر بوينه.
ئه‌وانه‌كيش ئويشن نادێ و ناكريه‌ێد، بايه‌سه له‌بانيان ته‌ماشاى ئيچنه ريكخرياگه‌يليگ بكه‌ن ك چوين ره‌سينه ئى حاڵه ك ئمڕوو دياره‌و چوين توانايه‌يل زاتييان هاوردنه كار وه‌بى وه‌رگرتن هويچ به‌خشينه‌يگ يا ده‌سميه‌تيگ ناوخوه‌يى و فه‌رمى له مامڵه‌كردن وه‌ل بريگ له روێ وه‌ڕوێ بوينه‌وه‌يل جددى و وه‌رده‌واميشن له كار ك خوه‌ى وه ئه‌ركه‌يلى پابه‌ند كرد، چوينكه ئه‌زانيد ك ناو فه‌يه‌ليه‌يل ته‌نانه‌ت له خه‌ياڵيش نامينێد ك ئه‌گه‌ر وجوود نه‌ياشتوون له‌بان زه‌وێ راسى!
خاستر ئه‌وه‌سه ئه‌را ئه‌وانه‌گ خه‌ته‌يل قرمز كيشن ئه‌را هه‌ڵويست و شه‌كه‌تى مه‌ردم وه‌ناو فه‌يليه‌يل، ئه‌وه بزانن ك وجوود ئه‌را ئه‌وانه نه‌مينێد ك كار ئه‌كه‌ن و ئسپات خوه‌يان ئه‌كه‌ن، دى ئه‌وانه هويچ ره‌نگ يا توانا يا پايه‌يگيان ئه‌رايان نامينێد.
عه‌لى حسێن فه‌يلى
