شیوەیگ ناشیرین وەرەو قەسر شیرین

2022-11-18T13:00:11.000000Z

کەنعان موڕاد/ لەو ریە ک لە بەغداد پایتەخت تیەێدە ناو خانەقین، لەبان ئەو جادەی دوو سایدی پانە، یە زیاتر لە یەک ساڵە، وەسنگ دروسکردن دەروازەی نوویگ ئەرا شارەگە، هەردوگ جادەگە چاڵ کردنە، و مەردمەگە ناچار بوون وەکنار جادەیل ماشینیان بڕانن.

چوینکە ئی ریە دەێدە ناو خانەقین، و ئەرا مەرز مەنزەریە چوود، هەڵبەت یەیش وەخاتر چەو خانەقین و خانەینیەیل نەکریاگە، باوجی وەخاتر داناین تەڵەی نوویگ ئەرا چەپاوکردن بارهەڵگریلە، و هەمیش وەخاتر زیارەتچیەیل ئیرانە، ک وەی ریەو روی وەرەو کەربەلا کەن.

وەگەرد ئەوەیش، و تیمین؛ شایەت بوودە سیمای رەنگینیگ ئەرا ئی شارە، و وتیمنیش؛ ئەگەر یەیش لە شاریگ وەڵکریاگ دروس بکریەێد لەوە خاسترە ک هویچیگ نەکریاگە، و وەی قسەیلە خوەمان خەڵەتانیمن.

ئیسە، ک سیمای ئەو دەروازە هاتە دەر، و ئاشکرا بوی ک ئی چەن مانگە لە چاڵکەنین و بیناکردن و ری بڕین، رەسیە ئەنجامیگ، وەلێ چ ئەنجامیگ؟.

مەردم خانەقین، یە چەن رووژیگە، قاقەی خەنینەیان وەتام گیرستن تیەێدە بان، هەنای باس ئەو دەروازەی فرە ناشرینە کەن، و هەنای وینەگەی لەناو سۆشیال میدیا بڵاو کەن، وەخوەیان ئویشن؛ خوەشی لە خوەمان، وەی بەدبەختیە.

چوینکە ئی مەردمە ک ئیسە بوینەسە خاوەن دەسەڵات ناو خانەقین، خەڵک خانەقین نیین، و نەیش کلتور ومیژوو خانەقین چیەسە پووسیان، هەڵبەت چشتیگ وەو شیوە دروس کەن تا خانەقین جویر خوەیان بوود، وەی بینای لار و ناشرینە، و هەمیش تا لەژیر ئەو بینا، خاڵیگ سەربازی دروس بکەن، و بکەفنە نوای بارهەڵگرەیل.

تا ئیسە کەسیگ لەوانەگ وەرپرسن لەی دەروازەی ناشرینە نەهاتیەسە دەنگ، شایەت دەسپیچگیگ ئەرا دروسکردن ئی بینا وەی شیوەی ناشیرینە نشان بیەن، یا بویشن یە هونەریگ ئەندازیاریە، و خانەقین هویچیگ لە هونەر نیەزانێد.

Shafaq Live
Shafaq Live