شه‌هيده‌يل كورد فه‌يلى
شه‌فه‌ق نيوز/ خوين ئه‌و شه‌هيده‌يل كورد فه‌يليه ك وه زوڵم و دوشمنى رشيا و خوين شه‌هيده‌يل نه‌ته‌وه‌ى كورد ك خه‌ريته‌ى كوردستان ئه‌زيز نه‌خشان، هوچ وه‌ختيگ ئه‌را مساومه‌و گه‌مه‌وازى نيه، چوينكه كيشه‌ى ئى قه‌واره‌ى كورد ره‌سه‌نه جوور تيشك خوه‌ره‌و ڕى ئه‌را نه‌وه‌يل رووشنه‌و ئه‌كا، دى چوين تيشك و گه‌رمى خوه‌ى ئه‌شارێده‌و له سزانن ئه‌وانه‌گ نزيكه‌و بوون له‌لى، به‌ڵێ كورده‌يل فه‌يلى رووڵه‌يل ئى نيشتمان ئه‌زيز و بازرگانه‌يل عراق و پاڵه‌وانه‌يل خه‌بات ڕى سه‌خت و ئازادكه‌ر نيشتمانن.
زوڵم و سته‌م و كووچ و دويره‌وخستن وه‌جه‌م ده‌رهه‌قيان ئه‌نجام دريا له‌لايه‌ن حكومه‌ته‌يل وه‌رين و دويره‌و خريان له شار و ئاوايى و شاروچكه‌يليان و هه‌ڵمه‌ته‌يل كووچ وه‌پيكرن و ده‌ركردنيان ئه‌را ئيران زياێ كرد وه‌تايبه‌ت له سه‌رده‌م ده‌سڵات به‌عس ترۆريستى، ك هه‌زاران جايه‌ڵ جوان و ژن و پياگ و گه‌وراو ته‌نانه‌ت مناڵ شيره خوه‌ريش له‌ليان گرت و كوشت و هيمان تائيسه‌يش چاره‌نويس فيشتر له 20 هه‌زار جايه‌ڵ جوانه‌يليان نادياره، ك له‌لايه‌ن زومره‌ى ترۆريستى فاشيسته‌يله‌و ده‌سگير كريان.
ئمجا له‌شوون رميان ده‌سڵات به‌عس، كورده‌يل فه‌يلى ئوميد كووتاييهاتن ئه‌و زوڵم و سته‌م و فه‌قه‌يرى و گه‌ناته‌كاريه كرديان له عراق، وه‌لێ جى داخه دڵته‌نگى بويه هووكار جيوازكردن بار وڵاته‌گه ئه‌را خراوتر و مامڵه‌كردن وه‌ل كورده‌يل فه‌يلى له‌ناوخود عراق و ده‌يشت وڵات و له باڵوێزخانه و قونسوڵخانه‌يل خراوتره‌و بوى تا رووژ ئمڕوو، وه‌ل ئه‌وه‌يشا نه‌ڕه‌سينه كه‌مترين مافه‌يليانيش له يه‌كسانى و دادگه‌رى و له‌وانه‌يش له مه‌سه‌له‌ى وه‌رگرتنه‌وه‌ى ره‌گه‌زنامه‌ى عراقى، ك تائيسه حكومه‌ت به‌غدا وه‌چه‌و ته‌به‌عيه‌ى ئيرانيه‌و ته‌ماشاى كورده‌يل فه‌يلى ئه‌كاو ئه‌را نموونه‌يش ك هيمان به‌ش بيگانه‌يل له وزاره‌ت ناوخوه‌يى ته‌ماشاى كيشه‌يليان ئه‌كا، يه‌يشبيجگه ره‌ته‌وكردن دامه‌زراننيان له دام و ده‌زگايه‌يل ده‌وڵه‌ت و نوێنه‌رايه‌تييان له په‌رله‌مان و شوونه‌يل تر ده‌وڵه‌ت و بيجگه ئه‌وه‌يش له‌ناونى ماوه‌يگ و ماوه‌يگيش له‌ناو به‌غداو ده‌يشت ئه‌و شاريشه ئه‌كه‌فنه ژير هه‌ڕه‌شه.
يه‌سه ئمڕوويش ياد شه‌هيده‌يل بيسه‌ر وشوون كورده‌يل فه‌يلى ئه‌كه‌يم و داواكاريم له خوداى په‌روه‌ردگار ره‌حم وه گشت شه‌هيده‌يل كوردستان و عراق بكاو بخاده‌يانه وه‌ر به‌زه‌يى وه‌رفراوان خوه‌ى و به‌هه‌يشت وه‌رين بدێده شوونيان.
قاسم مه‌نده‌لاوى
