پەرەستار ئومید .. خەباتکارێگ ئەڕا ژیان
شه‌فه‌ق نیوز/ هەست نەتەوەیی و نێشتمان‌پەروەری وڵکەر بڕێگ لە مەردم نییە چمان دە بنەماڵەێ هووش‌تێژێیان وەێجوورە گۆشێیان کریاگە ئوو باوەڕ و بیڕگێیان وەو باوەتەێل خوەیانەسە ک ژیان پێشکشێ وە پێیان کردگە و جوورێ ئامۆختەێیان کردگە ک تا هەمیشە هە تێکووشان بکەن ئەڕا ئازادی وڵات و سەربەرزی گەلەکەیان ئوو خاسترین ئارزووەێل دە دڵ خەڵکەگەیان بگریسنن.
ئی کارە وە تەنیایی، هە نەنریاگە مل ِ ئەو سەرکردەێلە ک وە شێوەێ راسان و خاسان ئەڕا خەڵک و نەتەوەگەیان، ئوو وە دڵپاکی و دەسپاکییەو دڵسووزی کردنە و هەمیشە دە لای وڵات و وڵاتوەندەێلەیان هە وەێجوورە ناسریانە باوجی یە نریاگه وە مل گشت ئەو کەسەێلەیش ک وە خەباتکاری پسپووری و مەدەنی خوەیان و هووش و فام خوەیان، کەڵکەڵەێ وڵات و وڵاتوەندەێلە داشتنە و دیرن ئوو تاکمەجارێگیش ئەڕا خاتر خزمەت وە خەڵک، گیان خوەیانیش نانەسە پاێ ئی کارە.
بڕێ لە ئەوانە گیان خوەیانیش نانەسە بان یە ک بتوانن زنەیی وە خەڵک بوەخشن و ژیان گەلەگەیان وە خوەشی بچوو وە سەر و چشتێ تر لە یە‌یش ناخوازن.
"داڵگ ِ شوان" ک ناوێ "قەمەرناز کەریم کەرەم"ە، یەکێگە لەو نموونەێل خەباتکار کورد فەیلییە ک ئازایانە ئوو وە خاتر مەردمەگەیان، رێگا و هەنازێ رووشن چەکاننە ئەڕا وەچ و وەچەزاێل خوەیان ئوو بنەوایێگ بڕ و بتاو داڕشاننەسەێ ئەڕا بانانێیان.
داڵگ شوان، خوەێ یەکێ لەو ژنەێلەسە ک ژیان خوەیان دانانە وە پاێ خزمەت وە باوەت کوردی و نێشتمانی خوەیان.
ئەوی دوماێ کوودەتاێ هەشت شوبات 1963 دە قورنگێگ کوردنشین دە ناوڕاس بەغدا وە ناو گەڕەک "عەگد ئەکراد" دە ناوچەێ "کیفاح" ده‌ور گه‌ورایه‌گ داشت. ئی ناوچە لە بەغدا وە ناوچەێ کوردەێل فەیلی ناسریاگە ک دە راپەڕین و راوسیان دە نواێ رژیم فاشیست بەعس سەددامی فرە ناو دەر کرد و دە ئەو بەێنەێلە بی وە سەمبوڵێگ ئەڕا بەرخوەدان دە نواێ کوودەتاچییەێل بەعسی ئوو دوماێ ئەوەێش بەس و پەیوەن بڕ و بتاوێ وەرد هێزگرتن کوردەێل هەرێم گرت و بی وە بەشێ گەورا لە شووڕش کوردی وە سەرکردایەتی ملامستەفا بارزانی. دەو وەختەێلە "قەمەرناز فەیلی" خوەێ رەسان وە ناو ئەو جمێشتە گەپە ئوو بی وە پەرەستارێگ ئەڕا تیمار کردن پێشمەرگەێلە و خێزانەگانێیان.
ئەوی خوەییش ژن جەنگاوەرێ بی و وەگەرد پیاگەێ خوەێ؛ هەمیشە تفەنگ بڕناوێ وە دەس و شەنگ‌قەتار وە شانێ بی ئوو بی وە یەکێ لەو ژنەێل پایەبەرزە دە ناو جەرخەێ یەکێتی ژنەێل کوردستان.
وەداخەوە "شوان" کوڕەگەێ دەو ناودەسان خەباتە جوانەمەرگەو بی و ئەوییش لە وەولا خوەێ ک داڵگ شەهیدێگ بی، جوور داڵگ گشت جنگاوەرەێلە دناسان و ئەڕا خاتر یە بی وە ناودارترین پەرەستار شووڕش ئەیلوول کوردەێلە دە عراق.
قەمەرناز فەیلی، وەێجوورە باس ئەزموونەگەێ دە دەهەێ شەسەگان میلادی ئەکا و ئێژێ: دوماێ داشکیان شووڕش و بەرخوەدان کوردەێلە؛ کوودەتاچییەێلە داخ ِ خوەیان دە مل ِ کوردەێل فەیلی رژانن و وەرد "کوودەتای رەش شوبات" هەڵامات هاوردنە عەگد ئەکراد و فرە لە پیاگەێل و نمام و نوونمامەێل کورد فەیلی بەغدا شەل و پەلەو کردن و وە دیلی بردنەیان.
ئەوی باس کرد: دوماێ یە ک ناوبەێن سەرکردایەتی کورد وەل کوودەتاچییەێلە شێویا ئوو یە بی وە دەس‌پێچگانێ ک بەعسییەێلە هێڕش بیارنە مل کوردەێل فەیلی بەغدا، خوەم و شووەگەم "دوکتور رزا" ک خوەییش یەکێ لە خەباتکارەێل لاییندار پارت دیموکرات کوردستان دە بەغدا بی، داجمیایمن و خوەمان رەسانیمنە پێیان.
"داڵگ شوان" دەبارەێ ئەو دەرچگنە وەێجوورە ئەڕا "شه‌فه‌ق نیوز" وتگە: لە بەغدا ک دەرهاتیمنە دەر، وەر ئەو شار سڵێمانی کەفتیمنە ڕێ و ئەڵەورە دو شەو بیمنە مێوان برامان "عەبدوڵحسێن فەیلی" ک خوەییش یەکێ لە یاوەرەێل خودالەێ‌خوەش‌بوو "ملامستەفا بارزانی" رێبەر گەوراێ کورد ئوو لە سەرکردەێل پارتی بی و دە ماڵ ئەوی بردیمنە سەر. ئەوی دە بەش ئیمە فرە برایەتی کرد و فرە زامەت کیشا و ئیمە رەسان وە کەمپ سەربازی پێشمەرگەێلە دە "ماوەت".
دە ناو کەمپەگە چاومان کەفت ئەڵە رەحمەتی مام جەڵاڵ تاڵەبانی، سەرۆک کومار وەرین عراق ک ئەوسا خوەییش یەکێ بی لە سەرکردەێل دیاری پارتی هەمیش چگیمنە خزمەت شەهید سامی عەڤدڕەحمان و ئوو براێل خەبات کار ترمان جوور "رەشید سەندی" و "عومەر دەبابە".
"قەمەرناز فەیلی" بان سێزدە ساڵ ئوو لە ساڵ 1963 تا 1975دە ناو شووڕش کورد گوزەران کرد ئوو دەو ماوە و ناوە وە جییەێل فرەیێگ رەسی و وەرد فرە کەسیش هام‌وشوو ئەکرد و چاوێ لە فرە کەسیش ئەکەفت. خوەێ لەێ بارەوە وە پێمان وت: دوماێ کار کردنم لە خەستەخانەێ گشتی شووڕشەگە لە ماوەت، چگم ئەڕا ئاوایی تەنکەڵە ک ئەڵەورەێلە بنکەێ تەندوروستی نوویێگ ک وە سەرپەرەشتی ئەبووشوان "باوگ شوان/ دوکتور رزا"شووەگەم وازێیەو کردیمن ئوو ئەوی خوەێ زامەت سەرەوەرە کردن ئەو بنکە و ئەو دووەێ بنکەێل ترەک ئەکرد. دوماێ قەێرێ تر دوارە گلەو هاوردیمن ئەڕا ماوەت ئمجا دە ساڵ 1966چگیمنه بنکەێ لەش‌ساغیێگ دە ئاوایی "مەرگە" سەر وە قەزاێ "رانیە" ئوو وە شوون ئەوەیش تا خەێلێ تر دە بنکەێ لەش‌ئازاوانی گەڵاڵە دە ناوچەێ "حاجی ئومران" کار ئەکردیمن و دوماێ دووسی کردن دەوڵەتەێل ئەوساوین ئێران و عراق و رێککەفتن یانزەێ ئازار 1970 ده خەستەخانەێل تەویلە و بەیارە، سەر وە هێز زمناکۆ کاروەدەس بیم ئوو تا پەنج ساڵیش دەورەێلە مام.
ئەوی دوماێ ئەوە باس برادەرەێلێ ئەکا ک هامیاری وە پێ کردنە و وت: ئەڕا رووژگار باسێ ئەکەم ک دەو بەێنەێلە برا و خوەشکەێلێ دیم؛ جوور خانمە پزێشکە "شیرین خوشناو" و "دڵخواز محەمەد" ئوو مێردەگەێ "محەمەد باجڵان" و دو براێ پزێشک "حەسەن" ئوو "فازڵ" ک ئەوانیش خزمەتەێل فرەیێگ وە خەڵکەگەیان ئەکردن.
"قەمەرناز کەریم" کوومڕێ ئەکیشێ ئوو وە ئەزرەتمەنییەوە باس خەفەتێ کرد ک وە خاتر خیانەت دەوڵەت "شا" وە سەرێ هات، ئوو وت: دوماێ دووسی پاتشاێ ئێران و سەددام ک سەرۆک وەزیران عراق بی؛ دەو ناودەسانە کوردەێل بینە قوربانی رێککەفتن نگریس جەزائیر "ئەلجه‌زایر"، گشتمان لە کوردستانەو وەرەو کەمپەێل ئاوارەێلە دە ئێران کەفتیمنە ڕێ ک شەهید ئیدریس بارزانی وە پێمان پەیام دا ئوو چڕییەمان وە کەمپ کەرەج تا دەو شارە وە کەمپ‌نشینەێل کورد خزمەتکاری پزێشکی بکەیمن ئوو ئیمەیش چگیمنە کەرەج.
"داڵگ شوان" لچەقوڵی گرتەێ و پڕ هەر دو چاوێ ئەسر بی و وت: "ئێسە ک دوماێ ئەو هەمگەێ قەێڕانە؛ ئەبینم کورد وە ئەنجام و سەرئەنجامەێل فرەیێگ رەسییە لە قوڕن دڵەو خوەشی ئەکەم ک لەو سایە وەێ مایە رەسییە و رەنجەڕوو نەکریاگە ئوو هەمیشە هە هەست ئەکەم ک "شوان" کوڕە شەهیدەگەم ک سەددام وە سێدارە کیشایەێ زینگەو بییە و ها وەگەردمەو.
ئی کوانەخەباتکار کورد فەیلییە ئمجا دوارە ئێژێ: همیردارم هەناێ ئەمرم دە باوش خاک پاک کوردستان تممەو بکەن.
چارەنووس "قەمەرناز کەریم فەیلی" یەکێگە لەو نموونەێل خەبات ئازایانە ئەڕا ژنەێل کورد فەیلی ئوو هەرچەن ک خوەێ دە رێ ئارمانجەێلەێ خەڵکەگەێ؛ کوڕەگه‌ێییش لە دەس دا ئوو گشت ژیان خوەێ و بنەماڵەگەێ دە شاران‌گەردی و شەڕوەدەری چگ وە سەر و هیچ ئاهێگێ خوەش نەدی وە چاو، هەمجا ئێسە فرە خوەشی ئەکا ک دوماێ چەن‌دە ساڵ ژیان سەخت و تیە‌ڵ، وە چاو خوەێ دی ک رەنج ئەو چین خوەیانە لە کیس کورد و کوردستان نەچگ ئوو یەمە وە دەوڵەتی سەر ئەو هەمگە شەهید و خەباتکارە و ئەو هەمگەێ عەزاو و خەزاو ناهساوە ک کورد کیشا، دەوڵەتێگ کوردی دامەزریاگە و دی کورد هەرێم، ژێردەسەێ کەسێ نییە هەرچەن ک کورد فەیلی دە بەغدا و تدە عراق هێمان ها دە وەرساێ هەڕەشە و دوچاوەکی عەراوەێل شڤنیست ئوو ها دە وەرلەفەێ زوور توند و تێژەێل مەزهەبی باوجی ئی چالاکوانە هێمانیش هیوادارە ک ئی ئەڵکەفت و دەسکەفتەێلە گەشە وە پێیان بدرێگ و حاڵ و رووژ خاسترەکێ ئەڕا کورد فەیلی دە گشت عراقیش بیاێگە دی.
ئەوی دە دوماقسەگەێ خوەێ ئێژێ: یە خاسە ک کەسێ ئارمانج‌خوازی بکا ئوو خوەێ و ماڵ و مینێ بکا وە قوربانی پاکی و دڵپاکی و دەسپاکی و خاسی و راسی، ئوو منیش جوور هەر ژنێ ک هیوا و ئارزووێ بداشتووبێگ هامە تەماێ یە ک ئیجوورە چشتەێلێ ببنە ئەڵکەفتێگ هەمیشانی ئەڕا کورد مانا؛ دە گشت دنیا ئوو ئەڕا هەر ئایمێگ تریش.
"قەمەرناز فەیلی" کەسێ بی ک وە هووش و فام خوەێ ئوو وە چەت باڵ خوەێ و وە تەنیایی، "بنەوا"ێ ئنسان‌دووسی ئوو خیرەتمەنی ئەڕا خەڵک هە ژار و هەژار و بێ‌دەسهەڵات خوەێ چکان ئوو وەێجوورە وە شانازی و ناوخاسی و نوورخاسییەو ژیان خوەێ بردەو سەر تا ناوێ دە هەمیشان تاریخ کورد و عراق و دە گشت دنیا، دوفێشتر دنیاێ پزشکی بدرەوشێگ، هەر وە وێنه‌ێ خوەێ ک ئەگرەوشیا و ئەگرەوسێ دە ئاسمان کوردەواری.
