تایبەتمەندی ساڵیاد “جینۆساید”...کورد فەیلی ئمساڵ
بایەسە کەسیگ فەیلی لە تەقەلایلی ئەرا خوەیگونجانن وەرد جەهان نوو، بڕیارە زیاتر گرنگی وەی بوونە بیەێد، و بایەسە هەماهەنگی زیاتر بوود ئەرا جیوەجیکردن ئەرک بەرزڕاگردن ئی یادە.
کارەساتەگە گەورەس و داواکارییەیل رەوان و جیماگەیل ئی تاوانە چەن مانا و دروشم وە ئازار لە یاد ئی کارەساتە گردەو کەن، کە ئاشکراکردن و شیەوکردن فرە کەس و لایەن ڕازی نیەکەێد.
مانای تاڵ ئاوارەبوین و دەروەدەری و لەدەسدان ناسنامە ئەوەسە کە زیاتر و زیاتر تەنیا بوینە! یە ئەزموون دڵتەزن ژیان و چیرووک خەڵک فەیلییە.
ئاشکراکردن ئەو خەوەرەیلە لە ساڵەیل گوزەشتە ئەرا وەهویرهاوردن میژوو قوربانیدان ئی بەشە لە نەتەوەی کورد دریانە، ئەوە خوازێد کە بویشیمن: تا لە ویژدان گەلەگەمان بژین، ئەو وەختە هاتیە ئەرا قسەکردن رویوەڕوی لە ناوەین فەیلیەیل.
یەیش ویرە و دڵسووزی و ئیرادەی گشت لایگ خوازێد ئەرا تەقەلای ئارامکردن فەیلیەیل لە ساڵیاد قۆناغ یەکەم جینۆساید کورد.
ئەگەر بنووڕیمنە ئاست و ریژەی بەشداربویەیل ئاهەنگەگە، ئەوە ئاشکراس کە جویر ساڵەیل گوزەشتە نەوەی نوو وەی مدووەیل خوارە ئامادە نەوین:
1- ئی نەوە هویچ کڕیگ وە رگری لە ناسنامەگەی نەیرێد تا ئەو ئاستە تەقەلا ئەرا بەرزڕاگردن یادەگە وە پیرووز نیەزانێد و بەشداری لەناو چالاکیەیل نیەکەێد.
2. لەوەر ئەوەگ ئاهەنگ بکریەێد ئەرا وەرخودان و قوربانیدان باوگوباپیرەیل، چوینگە ها ناو دونیای
نوویگ لە هویر و سیاسەت.
3. ئی نەوە چەسپانیە کە لە نەوەیل وەرین بیئومیدترە. هەر لەوەر یە مەودای ناوەین نەوەیل ئیسە و نەوەیل جاران فرە فرەس تەنانەت پەنا ئەرا فامستن لە گرنگی بوونەگە نیەوەن و دەرفەتیگ نەیشتن ئەرا دانیشتنیش وەیەکەو لەی جویرە بوونەیلە.
4- ئی نەوە لە بەڕنامەی یادکردن رازی نییە، و پانۆرامایگ جیاواز خوازێد ئەرا یادکردن جینۆساید و یەیش لە پلان ئیسە نیەسەی.
لە کۆتایی ئەرا فامستن لە مدوو ئەوە کە ساڵ لە دویای ساڵ هۆڵەیل یادکردن جینۆساید فەیلی وە چووڵی مینن، یە یەکیگە لەو پرسیارەیل فرە کە نەبایەس لە ئاشکراکردنیان نیگەران بویمن، و وە گشت ڕاسگووییگ، ئیمە ئی نەوە وە تەنیا تاوانبار نیەکەیمن هەرچەن کەموکوڵی دیرن، کە بەشیگ لە باج بڕیگ لایەن دەن کە قسە لەی باوەتە کرد و نەتوەنست پەیامەگە بڕەسنێد.
