وه وێنه: فه‌يلی يه‌كه‌مين ئۆتۆمۆبيل كوردستانی خه‌ێده وه‌ر چه‌و ئه‌ورۆپيه‌يل
هونه‌رمه‌ند گورانيچڕ و موزيكزان كورد "سه‌عه‌د فه‌يلی" ئاڵاێ كوردستان له‌بان ئۆتۆمۆبيله‌گه‌ی وێنه‌كيشاس و وه‌و جووره‌گ خوه‌ێ ئويشێ ئامانجی له‌ی كاره ئه‌وه بويه ك "جوور ئۆتۆمۆبيليگ كوردستانی له جاده‌يل وڵاته‌يل بخه‌ێده‌ێ وه‌رچه‌و هاووڵاتيه‌يل ئه‌ورۆپى".
فه‌يلی له‌وباره‌وه وه "شه‌فه‌ق نيوز" وت: "كوردستان ئه‌ڕا ئيمه وه مانای ژيان و جوانی و دووسداشتنه. من خه‌و وه‌و ڕووژه‌و دوينم ك گشتمان له‌بان ئی زه‌ويه ك خوراك و خواردنه‌وه‌گانێ به‌ش گشتمان كه‌ێد، وه كه‌رامه‌ته‌و بژيه‌يم و شانازی وه خوه‌ر ناوڕاس ئاڵاگه‌مان بكه‌يم".
زياتريش وت: "ئمڕوو شه‌وه‌كی ناسنامه‌ێ ئۆتۆمۆبيله‌گه‌م ته‌واو كردم و وه جوانترين ڕه‌نگه‌يل ڕازانمه‌وه‌ێ كه ئه‌وانه‌يش قرمز و چه‌رمگ و سه‌وزن و خوه‌ريش وه‌ماناێ ژيانه". ناوبرياگ هه‌ميش وت: "ئی ئۆتۆمۆبيله بويه هێما يا ڕه‌مزێگ ئه‌ڕا كوردستان له ستۆكهۆڵم پايته‌خت وڵات سويد و يه‌كه‌مين ئۆتۆمۆبيله وه‌ناو كوردستان ك له‌بان جاده‌يل ئه‌ورۆپی هامشوو كه‌ێد. شانازی وه‌پێه‌و كه‌م و جوور دويه‌ت ڕه‌نگينێگ وه جنگ كوردی وه‌لێا ڕه‌فتار كه‌م".
ا. ج
