وسیانیگ وەفاداری ئەرا هونەرمەن عەلی وەندی لە خانەقین
2022-04-01T15:45:06+00:00
شەفەق نیوز/ دۊای یەک رووژ لە کووچکردن هونەرمەن کورد عەلی وەندی، روشنهۊرەیل شار خانەقین، ئیوارەی ئمڕوو جمعە، وسیانیگ وەفاداری ئەرا گیان ئەو هونەرمەنە ڕێک خستن.
پەیامنێر ئاژانس شەفەق نيوز لە خانەقین وت: لە دۊەم رووژ پرسەی هونەرمەن عەلی وەندی، وە داوای فەرمانگەی روشنهۊری خانەقین، بڕیگ لە چالاکوانەیل شارەگە، و چەن کەسایەتییگ، و کەسەیلیگ لە بنەماڵەی هونەرمەن کووچکردی، لەلای پەیکەرەگەی لەناوڕاس شار خانەقین گردەو بۊن.
لە گردەوبۊنەگە، باسیگ لە ژیاننامەی هونەرمەن عەلی وەندی و خەبات و دڵسووزیی ئەرا کورد وکوردستان کریا.
هونەرمەن عەلی وەندی، خەڵک شار خانەقینە، لە ساڵ ١٩٤٠ لەداڵگبۊیە، بڕیگ گورانی لە رادیۆی کەرماشان و رادیۆی بەغداد توومار کردگە، ناسیارتریان گورانی (ئەی هاوسێکەی بەر پەنجەرە) بۊ.
