هەڵوژیایل یەکەمین خول فێستیڤاڵ سیناریۆنویس "لاو" لە مەهاباد دیاریکریان
مەنسوور جیهانی ـ هەڵوژیایل یەکەم تا سێیەم بەش کۆتایی یەکەمین خول فێستیڤاڵ سیناریۆنویس "لاو" لە شار مەهاباد دیاریکریان و خەڵات وەبانیان بەشەو کریا.
لە رسوومەیل کۆتایی یەکەمین خول فێستیڤاڵ سیناریۆنویس "لاو" ک لە لایەن ئەنستیتۆی فیلمسازی "لاوان فیلمی موکریان" وە وەرپرسیاری "ئیبڕاهیم سەعیدی" سینەماکار ناودار و خاوەن ئەزموون کورد، وە هاوکاری کۆمەڵەی چاپ و لەیزێر "زاگڕۆس" مەهاباد وە وەرپرسیاری "لوقمان رەحمانی" و ئیدارەی فەرهەنگ و ئیرشاد ئیسلامی مەهاباد و وە دەسەی دادوەری "جابر قاسمعەلی" و "محەمەدڕەزا گەوهەری" لە سیناریۆنویسەیل ناودار و وەئەزموون سینەمای ئیران؛ لە هۆڵ ئیدارەی فەرهەنگ و ئیرشاد ئیسلامی شار مەهاباد وەڕیەو چگ و بڕوایل کۆتایی ئی رویداو سینەماییە لە ناو سیناریۆنویسەیل پارێزگایل ئازەربایجان خوەرئاوا و کوردستان وە شیوەی خوارەو ناسانیان و خەڵات وەبانیان بەشەو کریا.
ـ سیناریۆی "جانتا" (چەمەدان) لە نویسین هاوبەشی "برایانی سامکۆ" بریتین لە "ئاکۆ زەندکەریمی" و "سامان حسێن پوور" لە شار سنە، پلەی یەکەم.
ـ سیناریۆی "وا ئیمە وەرد خوەی بەێد" (باد ما را خواهد برد) لە نویسین "وەحید خودابەندەلوو" لە شار قوروە، پلەی دویەم.
ـ سیناریۆی "ئامین" لە نویسینی "گوڵاڵە ستاوەند" لە شار مەهاباد، پلەی سێیەم.
لەی رسوومەیلە وەخاتر گرینگیدان وە ئەدەبیات جویر گرنگترین سەرچەوەی گێڕانەوە لە سینەما لە نویسەری نووخوازی کورد "جەلیل رەحیمی" وە بوونەی تەقەلا ئەرا دروسکردن کەشووهەوایگ نووڕیاگ هازداریگ و ئایدیای نوو مرۆڤانە لە بەرهەمە چیرۆکییەیل خوەی لە لایەن وەرپرسەیل یەکەمین خول فێستیڤاڵ سیناریۆنویس "لاو" ڕێز تایبەت لەلی گریا.
لە بەشیگتر لە رسوومەیل کۆتایی یەکەمین خول فێستیڤاڵ سیناریۆنویس "لاو" سینەماکار خاوەن ئەزموون کورد "ئیبڕاهیم سەعیدی" وەرپرس ئی رویداو سینەماییە وت: ئیمە دامەزرانن و پلان چالاکییەیل ئەنستیتۆی فیلمسازی "لاوان فیلمی موکریان"مان وەبان ئی بنەما داڕشتیمن ک بتوەنین دەسمیەتییگ بوین ئەرا خاسکردن باروودۆخەگە و هەرلیوا گرینگیدان و پەرەپێدان چالاکییەیل سینەمایی؛ هەر وەی ئامانجە تەقەلا دایمنە تا لە بنەمای سیناریۆ لە سینەما دەسوەپی بکەیمن.
وتیش: هەر وەی بوونە لە سەرەتا ریەگەمان وە داڕشتن و جیوەجیکردن یەکەمین خول فێستیڤاڵی سیناریۆنویس "لاو" دەسوەپی کردیمن و لەی بەستێنە تەقەلا دایمنە تا وە دەسمیەتی و تەقەلای کەرت تایبەت و هەرلیوا دامودەزگا پەویەندیدارەیل هونەر سینەما بتوەنین کەمیگ لە سیناریۆنویسە خاسەیل ناوچەگە دەستنیشان بکەیمن و بە وەپەی هیمەت خوەمان دەسمیەتییان بیەیمن.
جی ئاماژەس ک دویای بانگەواز یەکەمین خول فێستیڤاڵی سیناریۆنویس "لاو"؛ وە گشتیی 92 سیناریۆ کوڵ، لە لایەن سیناریۆنویسەیل ناوچەگە ڕوانەی نویسینگەی فێستیڤاڵ لە شار مەهاباد کریان ک لە ناویان لە لایەن دەسەی هەڵوژاردن ئەنستیۆت فیلمسازی "لاوان فیلمی موکریان" وە سەرۆکایەتی "بەختیار پەنجەیی" نویسەر و ئەکتەر وەئەزموون کورد؛ 12 سیناریۆی وەرچەو، دەسنشان کریان و چینە قۆناغ کۆتایی دادوەری و لە دوای هەڵسەنگاندن لە لایەن "جابر قاسمعەلی" و "محەمەدڕەزا گەوهەری" لە سیناریۆنویسەیل ناودار و خاوەن ئەزموون سینەما جویر ئەندامایل دەسەی دادوەریل،3 سیناریۆیل یەکەم تا سێیەم پەسەن کریان.
