هێڤی چه‌ن گورانییگ نوو به‌رهه‌م ئه‌يه‌رێ
له‌يباره‌‌وه ناوبرياگ وه ماڵپه‌ڕ کوردستان نوو وتگه: ئيسه خه‌ريك کارکردنم له‌بان چه‌ن گورانییگ نوو ک ئاوازو تێکست گورانییه‌گانیش له‌لایه‌ن هونه‌رمه‌ند زیاد ئه‌سعه‌ده‌و دانريانه.
هێڤی له‌شه‌قڵاوه له‌داڵگبويه‌و له‌خێزانێگ هونه‌ردووسیش گه‌ورا بويه، له‌باره‌ی چينه ناو ژیان هونه‌ریی ئويشێ:
هه‌ر له‌مناڵییه‌و ئاشنای هونه‌رو موزیک بويم‌و به‌شداری له چالاکیيه‌يل فره‌ێگ کردمه. دويای پێکهاوردن ژیان هاوسه‌ریش وه‌ل هونه‌رمه‌ند موزیکژه‌ن موحسن حه‌سه‌ن وه‌ته‌واوه‌تی هاتمه ناو دنیای گورانی‌وموزیک و تويه‌نستم چه‌ن به‌رهه‌مێگ‌و دو ئه‌لبووم تایبه‌ت وه‌خوه‌م بڵاوه‌وبکه‌م، ئه‌لبووم یه‌که‌م وه‌ناو (ئارامی دڵ) بوی ک له 7 تراک پێکهاتگه‌و ئه‌لبووم دويه‌ممیش وه‌ناو (هاوار) بوی ک ئه‌ویش له8 تراک پێکهاتگه. له‌جه‌م ئه‌و به‌رهه‌مه‌يليشه 8 ڤیدیۆ کلیپ تومارکردمه.
له‌باره‌ی ئه‌و که‌سه‌يليشه ك له‌بوار هونه‌ریدا هاوکاریی کردنه هێڤی وت:
فره له‌هونه‌رمه‌نده‌يل هاوکارو ده‌سمه‌يه‌تده‌رم بوين‌و ئاوازو شعرو موزیک ئه‌ڕا گورانییه‌گانم دانانه، وه‌تایبه‌ت هونه‌رمه‌ند زیاد ئه‌سعه‌د. هه‌ميش مامۆستا جه‌بار حه‌بیب شاعر ک وه‌شعره نازکه‌گانی له‌ئه‌لبوم یه‌که‌م‌و دويه‌م هاوکاریم کرد. وتیش: فره سپاس هاوسه‌ره‌گه‌م که‌م ک به‌شدارو هاوکارم بوی له‌هه‌ردو ئه‌لبومه‌گه‌م چ جوور ئاوازدانه‌ر چ جوور موزیکژه‌ن.
ئی خانمه گورانیچڕه ساڵ 1997 وه‌ل خانه‌واده‌گه‌ی چينه‌سه ده‌‌یشت کوردستان‌و له‌ئه‌ڵمانیا نیشته‌جێبوين، وه‌لێ ئيسه گله‌وخواردنه‌‌و له‌هه‌ولێر نیشته‌جێن.
ا. ج
