لە رووژ لەداڵگبوینی.. دیارترین هەشت فیلم لە میژوو جۆرج کلۆنی

شەفەق نيوز/ ئەسارەی هۆلیوود جۆرج کلۆنی، رووژ سێشەممە ٦ ئایار یاد ٦٤ ساڵەی لەداڵگبوینی کرد، دویای زیاتر لە چوار دەیە لە ژیان هونەریی، لەو ماوەی ڕۆڵ سەرەکی لە چەن بەرهەمیگ سینەمایی داشت کە جویر یەکیگ لە ناوە دیارەیل شاشەی گەورە دامەزران.

وەی بوونە شەش لە دیارترین فیلمەیل پیشکەش کەیمن تا گشت سینەمادووسیگ تەماشای بکەێد:

From Dusk Till Dawn "لە ئیوارەو تا گوڵ سوو"

 لەی فیلم تریلەرە، کلۆنی وەرد کوینتین تارانتینۆ رۆڵ دوو برای هاوبەش رانن کە لە داگگا واینە، لە باڕیگ دویر لە بیاوان مەکسیک خوەیان شارنەو، تا  تویش خوینمژەیل تیەن. فیلمیگ کە رخبەرو و ویرەداری رۆڵ کلۆنی نشان دەێد.

Three Kings سێ پاشا

لەی فیلمە کە باس لە یەکەم جەنگ کەنداو کەێد لە ساڵ ١٩٩١، چوار سەرباز ئەمریکی خوازن دزییگ تەڵا بکەن، فیلمەگە درامای جەنگی و تەنزیگ سیاسی وە شیوەیگ ناوازە تێکەڵ کردگە.

The Perfect Storm 

زریان گونجیاگ 

وە پشتبەسین وە رویداوە راسگانیەیل، کلۆنی رۆڵ کاپتن فرانک "بیلی" تاین جونیۆر رانێد، کە کاپتن کەشتی ماسیگردنە، و تیمەگەی لە زریانیگ ویرانکەر گیر خوەن، فیلمەگە داستانیگە لەباوەت نواگیریکردن و جەنگ وەرد هازەیل سروشت.

Out of Sight لە دەیشت کۆنترۆل 

لەی فیلمە کلۆنی رۆڵ دزیگ پیشەگەر رانێد کە عاشق ژنیگ پۆلیسە (جێنیفەر لۆپێز)، فیلمەگە کۆمیدی و ئەکشن و رۆمانسی تێکەڵ کردگە، و کیمیای ناوەین ئەو دوو ئەسارەس یەکیگە لە گرنگترین چشتەیلی.

Michael Clayton مایکل کلیتۆن

لەی فیلم یاساییە، کلۆنی رۆڵ پارێزەر مایکل کلیتۆن رانێد، کە پیلانیگ گەورە لەناو کۆمپانیایگ گەپ ئاشکرا کەێد.

O Brother, Where Art Thou?

ئەی برا هایدە کوو؟

فیلمەگە لە ساڵەیل ١٩٣٠ رویدەێد و مینەی سێ زیندانی کریەێد کە واینە و ئەوانەیش کەفتنەسە مینەی گەنجینەیگ وەچاڵنریاگ، ئی فیلمە وە یەکیگ لە خاسترین رۆڵەیل کلۆنی دانریەێد و تێکەڵەیگ لە کۆمیدی و سیحری مۆسیقای هاناوی.

Wolfs "گورگەیل"

نووترین بەرهەم جۆرج کلۆنی دراما و تێکەڵیگ وەرد کۆمیدی، لە دەور دوو کەس دەیشت یاسا گەڕدێد کە لەناو زنجیرەیگ رخداری یەکانگیرەو بوون ئەرا ئەنجامدان ئەرکیگ هاوبەش، لە رۆڵ سەرەکی براد پیت، ئۆستین ئەبرامز، ئیمی ڕایان و ئیرینا دوبۆڤا.

Ticket to Paradise  بلیت بەهەشت

کۆمیدیایگ ڕۆمانسی لەباوەت ژن و شوییگ جیاوەبوی کە چن ئەرا بالی ئەرا رزگارکردن دویەتەیان لە هاوسەرگیرییگ سوپرایز، وەگەرد ناکۆکی بەردەوامیان، وە ئاگربەس رازی بوون و لە ماوەی مەنینیان لەی شوین ئەفسوناوییە دووسیان گلەو خوەێد، لەی فیلمە جۆرج کلۆنی و جولیا ڕۆبەرتس و لوکس براڤۆ رۆڵ سەرەکی رانن.