له‌شوون 40 ساڵ په‌روه‌رو تاتڵسێس چه‌ويان كه‌فێده يه‌ك
وه‌گوره‌ی خه‌وه‌رێگ ڕووژنامه‌ی (حورییه‌ت) تورك، په‌روه‌رو تاتڵسێس ك هه‌ردگیان خه‌ڵك (ئورفا)ی باكوور كوردستانن، دويای چه‌وكه‌فتنيان وه‌یه‌كتری، وه‌يه‌كه‌و ڕووشنايی خسته بان دیداره‌یل ئمرالی‌‌و ئه‌و قوناغ ئاشته‌واییه ك ئيسه باس له‌باره‌يه‌و ئه‌كريه‌ێد، ئه‌ڕا چاره‌سه‌ركردن پرس كورد، له‌و چوارچێوه په‌روه‌ر وت:"وه‌ل كاكه ئبراهیم داوا له‌گشت هونه‌رمه‌نده‌یل توركیا كه‌یمن، ك پشتگیری له‌قوناغ ئاشته‌وایی بكه‌ن".
شڤان په‌روه‌ر وتیش:"گشت كه‌سێگ وه به‌هايه‌یل خوه‌یه‌و جوانه‌و هویچ جیاوازییگ له‌ناونی تورك‌و كورد نییه، حكوومه‌ت بايه‌د وه‌یه‌كسانی تماشای گشت كه‌سێگ بكا، هونه‌رمه‌نده‌یليش له‌ڕێ ئاينده‌ی ملله‌ته‌يل توركیا، خوازیارن ئاشتیو سه‌روه‌خوه‌یی‌‌و دووسایه‌تی له‌و وڵاته به‌رقه‌رار بوود، بايه‌د هونه‌رمه‌نده‌يل ڕۆڵ بوينن له‌ی قوناغه‌و پشتگیری خوه‌یان دووپاته‌و بكه‌ن و قوناغه‌گه وه‌هێزتر بكه‌ن، بايه‌د لهيساودويا توركیا ئاڵشت بكريه‌ێد وه‌ره‌و دیمۆكراسی، یاسایل ده‌وڵه‌ت وه‌شێوه‌یگ یه‌كسان وه‌ڕێه‌وبوريه‌ن‌و ماف هاووڵاتیه‌يل له‌وه‌رچه‌و بگیريه‌ێد".
له‌وه‌رانوه‌ر وته‌یل په‌روه‌ر، تاتڵسێس باس له‌وه‌كرد، ك ئيسه وه‌خت ئاشتیو برایه‌تی‌‌و باوه‌ش وه‌یه‌كاكردنه، نادێ كه‌س وه‌ربه‌س له‌وه‌رده‌م ئه‌و قوناغه دابنه‌ێد، بايه‌د ڕێگری له‌خوينڕشانن بكريه‌ێد.
هاووه‌خت شڤان په‌روه‌ر جه‌خت له‌وه كرده‌و، ك بايه‌د حكوومه‌ت لێدوانه‌یل ئاشتی وه‌هێزتره‌و بكا، بايه‌د لهيساودويا جه‌نگ بووسيه‌ێد و كويه‌گان بۆردمان نه‌كريه‌ن‌و مناڵه‌يل نه‌گيرن‌و جوانه‌يل نه‌مرن، سه‌رباز‌و گه‌ریلا مناڵ وڵاتێگن ك چه‌نه‌ها ساڵه خوه‌شی به‌خشنه یه‌كتری‌‌و خزمایه‌تی له‌ناو یه‌كتری دروسكردنه، بايه‌د قوناغه‌گه ئاڵشت بكريه‌ێد و خوين نه‌ڕشيه‌ێد، بيلا ئاو كويه‌گان سه‌وزایی بوه‌خشنه دارستان‌و باخه‌گان و جوانییان ده‌ربكه‌فێ، ته‌نيا ئه‌گه‌ر ئايمه‌يل له‌یه‌كتری بفامن، ئه‌و خاكه به‌ش گشت كه‌سێگ ئه‌كا.
ا. ج
