فیشەک ئەمریکی لە بەغداد خیزانیگ عراقی وەرەو "کەفارەت" هۆلیوودی کیشێد

شەفەق نیوز - ئەڵگەردان تایبەت

فیلم "Atonement" (کەفارەت - وەخشین) چیڕووک خیزانیگ ئەرمەنی مەسیحی لە سێ نەوە گلەو دەێد، کە سێ لە ئەندامەیلی وە گولەی سەربازەیل پیادەی هێز دەریایی ئەمریکی کوشیان ماوەی جەنگ وەرد هێزەیل عراقی لە پایتەخت بەغداد لە نیسان/ ئەپریل 2003، لە یەکیگ لە چیڕووکە مرۆییە بەسیاگەیل وە جەنگ لەبان عراق.

 رۊداوەیل فیلمەگە، وەپەی راپۆرتیگ ئەرا رۆیتەرز کە ئاژانس شەفەق نیوز ئەڵگەردانی کرد، لە دەور دیداریگ گەردێد دۊای نزیکەی دەیەیگ لە رۊداوەگە، کە دوو ژن کە لە تەقەکردنەگە رزگاریان بۊ وەرد یەکیگ لە سەربازەیل پیادەی هێز دەریایی کە تەقە لەبان ماشین خیزانەگە کردن گردەو کرد، ئەوەیش لەناو ماڵ خیزانەگە لە شار گلێندێڵ لە ویلایەت کالیفۆرنیای ئەمریکی.

 دیدارەگە باوەت نشان دەێد کە رید ڤان دایگ نویسیەسەی و دەرهێنان ئەرای کردگە، و وە یەکەمین فیلمەیل چیڕووکی دریژ لەقەڵەم دریەێد، و یەکەمین نیشانداینی لە ئەمریکای باکوور لەناو فیستیڤاڵ تۆرۆنتۆی سینەمایی ناودەوڵەتی ئی مانگە وەخوەیەو دی، لەبان ئەوەگ نیشانداینی لە سینەماگان لە رووژ جمعە دەس وەپی بکەێد.

 فیلمەگە پشت وە راپۆرتیگ بەسێد کە گۆڤار نیویۆرکەر لە ساڵ 2012 بڵاوی کردگە ئەرا رووژنامەنویس دێکستەر فیلکینز، کە دۊاتر بەشداری لە رێکخستن دیدارەگە لە ناوەین سەربازە وەرینەگە و ئەندامەیل خیزانەگە کرد.

 کینێس براناه رۆڵ رووژنامەنویس مایکڵ رید ئەنجام دەێد، لە وەختیگ هیام عەباس کەسایەتی مەریەم دەرخەێد، داڵگ خیزانەگە کە شۊەگەی و دوو لە مناڵەیلی لەدەس دایە، لە وەختیگ بۆید هۆلبرۆک رۆڵ لو دالیساندرۆ ئەنجام دەێد، کە سەربازیگ وەرینە لە پیادەی هێز دەریایی و تەقەلای داوای وەخشین دەێد.

و دروسکەرەیل فیلمەگە ناو کەسایەتییەیلە ئاڵشت کردن لە وەراورد وەرد کەسایەتییە راسگانیەیل، کە سەرباز وەرین لو لوبیلۆ، و مارگرێت کاچادۆریان، و رووژنامەنویس فیلکینز لەناویانە.

 ڤان دایک، لە دیداریگ وەرد ئاژانس رۆیتەرز، وت کە کەسایەتییە عراقییەیل لە فیلمە باوەیل کە باس لە جەنگ عراق کەن فرەی وەختەیل "لەڕی دووربین نشانگرەیلەو یا لە باکگراوند" دەرکەفن، و دیاری کرد کە خوەی خوزیە ئی گووشە پێچەوانەو بکەێد و رووشنایی بخەێدە بان ئەو کەسەیلە کە وە شیوەیگ راستەوخۆ کاریگەرییان وە جەنگەگە بۊە.

 دۊای گلەوخواردنی لە عراق، لوبیلۆ لە شیویان دۊای شۆک دڵگران بۊ، و هۊر کوشیان مەدەنییەیل وە دەس یەکەیەگەی لەو رووژە مەنە شۊنی، وەرجە ئەوەگ لە فیلکینز بخوازێد دەسمیەتی بەێد لە پەیوەندیکردن وەرد خیزان کاچادۆریان.

 خیزانەگە رازی بۊن لەبان دیدارەگە، و دیدارەگە وە گەردنئازایی لە سەربازە وەرینەگە کووتایی هات.

 هۆلبرۆک وت کە فیلمەگە باس لە ململانێی کەسایەتی لو کەێد وەرد ئەوەگ رۊ دا، لە وەختیگ عەباس توانای مەریەم لەبان وەخشین وە سەرنجکیش وەسف کرد، وە هۊرهاوردن ئەزموونەگەی چۊ داڵگیگ و چۊ ژنیگ فەلەستینی کە لە ژینگەیگ گەورا بۊە جەنگەیل وەخوەیەو دیە.

براناه دیدار ناوەندی لە فیلمەگە وە "کاریگ جیاواز لە لاوازی مرۆیی" وەسف کرد، وە پەسنکردن رازیبۊن هەردگ لایەنەگە وە چگن ئەرا ناو گفتوگۆیگ بی ئەوەگ وە مەرج بڕەسنە ئەنجامیگ یا وەڵامیگ ئاشکرا.

 بڕیارە نیشانداین "Atonement" لە سینەما هەڵوژریاگەیل لە 2 تشرین یەکەم/ ئۆکتۆبەر ئایندە دەس وەپی بکەێد، وەرجە ئەوەگ نیشانداینی وە شیوەیگ فراوانتر لە 9ی تشرین یەکەم/ ئۆکتۆبەر فراوان بوود.