دوانزهمین ساڵهات کووچ کێخاێ رووژنامه‌وانی ئیلام
شەفەق نیوز- دوانزە ساڵ وەر ژە یە ماشالا ره‌شنەوادی، پیر رووژنامەوانی ئیلام، دە شەس و هەفت ساڵان، دۆماکووچ خوەێ کرد.
چل ساڵ رووژنامەوانی، نام رەشنەوادی دە میژوو رەسانە و خەوەر دە ئیلام، تا وە هەی زینگ دهیلێ.
رەشنەوادی دە ساڵ 1346 هەتاوی، یانێ پەنجا و سێ ساڵ وەر ژە یە، دەفتەر سەرپەرەستی هەواڵنێری ئیرنا، پارس ئەوسا، وازەو کرد و بی وە یەکم هەواڵنێر رادیان و تلیفزیان ئیلام.
ئەوی دە سەرەتای دەهەێ 1370 هەتاوی، نزیکەێ سی ساڵ پێش، سەردەبیری هەفتەنامەی "پەیک ئیلام" گرتە دەس و دە چەن دەهە کار بێ‌هچان، گڕێ نەهیشت ک ئی کارە دابمینێگەو.
ئەوی دە کارەێ خوەێ، هەم فرە هەنەکچی بی و هەم دە جی خوەێ فرە تونەمەزاو و سەختگیر.
دەنگە خوەشەێ خاڵوو ماشەلا، وەختێ ک ئێوارەوەختێ ئەڕا شەکەتی‌دەرکەری، دەنگێ، گوورانی کوردی، دوفێشتر (خاڵوو رێوار) دچڕێ، هێمان ک هێمانە ها دە ویر گشتێ.
چاپ یەک لاپەڕە وە نام (زوان ئیمە) وە کوردی فەیلی ک وە سەردەبیری کامران رەحیمی، جوور بەشێ لە پەیک ئیلام ددەرهاتە دەر، یەکێ لە کارەیل دڵخواز رەشنەوادی بی ک هەمیشان پشتەوانی لەێ دکرد.
