کاریگەری ئەڵاجەویگ.. توێژینەوەیگ باس کاریگەری دارچین کەێد لە بان تەندروسی ئنسان
شەفەق نیوز/ هیمان زاناگان رووژ وەرووژ ئاشکرای سودمەنی نوویگ ئەرا تفتیەگان کەن، ک وەرجەیە نەزانریاگە، و ئەیە دویاترین ئاشکراکردنیە ک رەسیەسە کاریگەری ئەڵاجەوی دارچین لە تەندروسی ئایەم.
توێژینەوە نووەگە دەرخست ک فرە وەکارهاوردن دارچین توانای دەسمیەتی دیرێد ئەرا ئەوانەگ زیان دوینن لە بەرزەوبوین شەکەر لە خوینیان و مقەیەتی بیماری شەکرە، ک ملیۆنان کەس لەلی زیان دوینن.
دارچین لە تفتیە بوون دارەگانە لە تووکڵ دار دارچین بڕیاگە، و کۆنتڕۆل شەکەر لە خوین ئایەم خاسەوکەێد لە قۆناغ وەرجە تووشهاتن وە بیماری شەکرە، و هەمیش توانای یەواشکردن کاریگەری بیماریەگە دیرێد.
توێژینەوەگە لەبان ٥١ بەشدار کریا تەمەنیان ناونی ٢٠ و ٧٠ ساڵ بوی، لەوانەگ یەکیگ لە سێ كێشەی دیاریکریاگ دیرن لە گلوکۆز لە مەوقەی مانگکردن.
بەشدارەگان خریانە ژێر چەودیری تا ماوەی ١٢ هەفتە، و بەشەو بوین لە ناونی ناوەند پزشکی لە زانکۆی '' کیونگ هی'' لە سۆل لە کۆریای باشووری، و ناوەند جۆسکین ئەرا شەکرە لە شار بۆستن لە ولایەت ماساچوستس ئەمریکی.
توێژینەوەکارەیل یەک کەپسول ٥٠٠ ملیگڕامی لە تەواوکەرەیل دارچینەگە دانە بریگ لە بەشدارەیل، و ئەو بڕگە دەرمانیگ دروکانی دریا پیان، ئەویش رووژی سێ تاق ئەرا ماوەی ١٢ هەفتە.
توێژینەوکارەیل دین ک تەواوکەرەگان دارچین رێژەی گلوکۆز سروشت کەمەوکرد لە مەوقەی مانگردن، و لەشەگە گونجیا وەگەرد وەکارهاوردن تاقیگ لە کاربۆهێدر.
توێژینەوەگە ک لە ناوبەین ساڵەیل ٢٠١٧ و ٢٠١٨ کریا، ئاشکرا کرد ک هیچ کاریگەری خراویگ لە وەکارهاوردن دارچین نیە، و دەرخست ک تەواوکەرەگانی لە مەترسی تووشهاتن وە بیماری شەکرە کەمەوکرد
