ژنيگ چينى ناتويه‌نێد ده‌نگ پياو بژنه‌فێد!
شه‌فه‌ق نيوز/ ژنيگ چينى وه‌ناو "تشن" له شار "شيامن" له ديم رۆژهه‌ڵات چين له‌ناكاو له خه‌وا هات و ئاشكراى كرد ك تواناى ژنه‌فتن ده‌نگ نه‌يرێد و هه‌ر وه‌و خاتريشه يه‌كسه‌ر جيواز كريا ئه‌را نه‌خوه‌شخانه له‌وه‌ر ده‌رخستن هووكار ئه‌و حاڵه‌ته، وه‌لێ حاڵه‌تيگ ده‌گمه‌ن له‌لێ روێدا، ك ئه‌ويش ئه‌وه بوێ تويه‌نست ده‌نگ پزيشكه‌يل ژن و سسته‌ره‌يل و ژنه‌يل تر بژنه‌فێد و ده‌نگ پياو نه‌ژنه‌فێد، ك يه‌يش مه‌ردم خسه سه‌رسوڕمه‌نين له وه‌رانوه‌ر ئيچنه حاڵه‌تيگ ده‌گمه‌ن!.
تشن دوياى تاقيكردنه‌وه ده‌ركه‌فت ك له‌ده‌سداين ژنه‌فتن ده‌گمه‌نيگ ديرێد وه‌ناو له‌ده‌سداين "ژنه‌فتن چه‌واشه‌ى ليژاوێ" يا "ژنه‌فتن ته‌ره‌دود نزم"، ك يه‌يش ماناى ئه‌وه‌سه تواناى ژنه‌فتن ته‌ردوده‌يل ده‌نگ نزمى نه‌يرێد.
جى باسه، پزيشكه‌يل ره‌سينه ئه‌و باوه‌ڕه ك ئيچنه حاڵه‌تيگ په‌يوه‌سه وه هووكاره‌يل ميراتى يا تويشهاتن وه فشاريگ فريه تون ده‌روينى.
