وە بوونەی ٨ مارس پیاویگ ١٠٠ پارچە تەڵاو چەپکیگ گوڵ کردە دیاری

شەفەق نیوز/ وەبوونەی ئاهەنگ سازدان  رووژ جەهانی ژنەیل، پیاویگ ک لە شار "دانانج" لە ناوەڕاس ڤێتنام، چەپکیگ گوڵ و ١٠٠ پارچە تەڵا کردە دیاری ئەرا ژنیگ. 

ماڵپەڕ "ڤی ئێن ئێکسپرێس"ی ڤێتنامی دیاریکرد ، ئەو پیاوە ١٠٠ پارچە تەڵا بردیە ئەرا دوکانیگ گوڵ فرووشی  و داوا لەلی کردیە ک چەپکیگ گوڵ ئەرای رازاوە بکەێد و وەگەرد تەڵایلە بنەێد ک نرخیان رەسیە وە ٣٠٧ هەزار دۆلاری ئەمریکی. 

هەر پارچەیگ لەو تەڵایەیلە  شێوەی تەختیگ داشتنە کێشی ٣٧.٥ گرام بۊە. 

خاوەن دوکان گوڵەگە ک ناوی لۆنگ تی جیاو بۊە وتیە؛ ئەو پیاوە ک ناوی ئاشکرا نەکردیە ٢٠ ملیۆن دۆنگ ڤێتنامی دایە ئەرا ئامادەکردن چەپکە گولەگە، وتیە وەپی یە ئەرا ژنیگ سەندیە ک لە شار "کان تو" باشوور وڵاتەگە ژیەێد، یەیش وە بوونەی رووژ جەهانی ژنەیل بۊە.