چۊن ڤیتامین دی لە لەش فرە بکەیمن؟
شەفەق نیوز/ یەلینا فۆسکریسینسکایا پسپۆر خوەراک لە روسیا راگەیاندیە، بڕیگ ماددەی خوەراکی بوونە جیگر ڤیتامین دی لە لەش، وەتایبەت ئەرا ئەو کەسەیلە گرفت کەمبۊن ڤیتامینەیل دیرن.
ئەو پسپۆڕە ئەرا ئاژانس نوفوستی روسی ئاشکەرا کردیە، ڤیتامین دی یەکیگە لە گرنگترین ڤیتامینەیل ک لەش خوازێدەی و دەسمیەتی مژین کالسیۆم و فۆسفۆر ناو خوەراک دەێد، نواگری لە پۊکەوبۊن و نەرمبۊن سوخان گرێد و ری لە ئەوزەڵکردن شێرپەنجە گرێد، وەگەرد ئەوەیش دەسمیەتی وەقایمکردن دەمارەخانەگان و وەرگریی لەش و داوەزین ئاست کۆلیسترۆڵ لە خۊن دەێد.
ئەو پسپۆرە وتیە "لەش ٩٠% ڤیتامین دی لە ری تیشک سەرو وەنەوشەیی بەرهەمتێرید، باوجی لە وەرز زمسان بڕ تیشک خوەر کەمەوبوود و ئاسمان لە فرەی وەختەیل ئەور و تەمە، ئەرا ئەو ڤیتامینە لە خواردن دەرمان توەنرێد سوود لە خواردن ماسی سەلەمون و جگر ماسی و کاڤیار سوور و سیا وەربگرێد".
وەگورەی ئەو پسپۆرە توەنرێد وە خواردن قارچگیش ڤیتامین D ئەرا لەش دابین بکەێد، باوجی زیاتر ئەو قارچگەیلە لە دارستانەیل نەک لە بازاڕەیلە، ئەو ڤیتامینە لە خا و گوشت مانگا و کەرە و شیر بزن و پەنیر هەس.
