مەردم کۆریا واز لە خواردن گووشت سەگ تیارن

شەفەق نیوز- سئۆل

کۆریای باشوور ئامادەکاری کەێد ئەرا کووتاییهاوردن وە بازرگانی گووشت سەگ وە شیوەیگ تەواو لە شوبات 2027ەو، دۊای دەیان ساڵ لە مشتومڕ لەباوەت ئی کارە کە وە شیوەیگ نەریتی گریەدریاگ بۊ وە رووژەیل گەرم تاوسان، لە ناو وازهاوردن گەورەیگ لە خواردی و ئاڵشتنی تەمەشاكردن مەردم ئەرا خواردن سەگ و وەکارهاوردن گووشتەیلی.

 لە تاوسان 2026، کە نوێنەرایەتی دۊایین تاوسان کەێد وەرجە چگن وەرەو قەیەغەکردن گشتگیر ئەرا بوار جیوەجیکردن، دیمەنەیل ئی بازرگانییە جیاوازتر لە گوزەشتە دەرکەفتن، و وە تایبەت لە بازاڕ مۆران لە شار سۆنجنام، کە وە یەکیگ لە دیارترین سەنتەرەیل بازرگانی گووشت سەگ لە وڵاتەگە هەژمار کریاد.

 جۊلە لە بازاڕەگە وە شیوەیگ دیار کەمەو بوی، لە وەختیگ فرەی دوکان و چێشتخانە تایبەتمەنەیل دەرەيلیان بەسان یا ئاڵشت بۊن ئەرا پیشکەشکردن خواردنەیل ترەک، لەناویانیش شلەی گووشت بزن سییە، وەگەرد مەنیەن شمارەیگ کەم لە وەتەمەنەیل کە هێمان سەردان شوینەگە کەن ئەرا مینەکردن خواردنەیلیگ کە گریەدریانە وە یادگارییە کۊنەیلیان.

 ئی ئاڵشتيە دۊای داوەزیان پلە وە پلە لە ەەکارهاوردن گووشت سەگ تیەێد، کە پاڵنەرەگەی ئاڵشتنی هەڵوێستە کۆمەڵایەتییەیل و بەرزەوبۊن هوشیارییە وە مافەیل ئاژەڵ، کە راپرسیەیل نشان دەن کە زیاتر لە 90 لە سەد کۆریەیل نیاز خواردن گووشت سەگ لە ئایندە نەیرن.

 پەرلەمان کۆریای باشوور لە کانوون دۊیەم 2024 یاساییگ پەسەن کردۊد کە قەیەغەی خواردن سەگ و سەربڕینی و بەشەوکردن گووشتەیلی و فرووشتنی ئەرا خواردن کەێد، وەگەرد داین مووڵەت سێ ساڵ وە کارکەرەیل ئی کەرتە ئەرا پاکتاوکردن کارەیلیان وەرجە دەسکردن وە جیوەجیکردن قەیەغەگە وە شیوەیگ تەواو.

 کاریگەری یاساگە رەسیە هەزاران دامەزراوەی گریەدریاگ وە ئی بازرگانییە، کە زیاتر لە 5600 دامەزراو گردەو، لەناویانیش کێڵگە و چێشتخانە و دوکانەیل، لە وەختیگ فرەی کێڵگەیل سەگ دەرەیلیان بەسان وەرجە رەسین مەوقەی کووتایی.

 وەگەرد ئەوەگ قەیەغەگە پشتیوانییگ فراوان لەناو کۆریای باشوور وەدەس تیەرێد، وەلی کووتاییهاوردن وە ئی کارە هەستەیل جیاجیایگ دروس کەێد لەناوەین ئەوانەگ وە گامیگ دۊنن کە ئاڵشتنی کۆمەڵگە نیشان دەێد و مقیەتییکردن ئاژەڵەیل خەسەو کەێد، و لەناوەین کەسەیل ترەک کە وە جویر بەشیگ لە نەریتیگ کۊن تەماشای کەن کە لەبڕیان نزیکەو بوود.