ماشینیگ "بینتلی" لە لەندەن دزیا لە کەراتچی پەیا کریا
شەفەق نیوز/ لە رویداویگ ئەڵاجوی، لە شار کەراتچی پاکستان، ماشینیگ "بینتلی" گرانبەها پەیا کریا، ک وەرجە چەن هەفتەیگ لە لەندەن پایتەخت بەریتانیا دزیاگە.
وەگورەی رووژنامەی دەیلی مەیل بەریتانی، ماشینەگە مارکەی "مولسان سیدان" نرخەگەی لە ٣٠٠ هەزار دۆلار ئەوبانە، لە ماڵیگ لە لەندەن دزیاگە، وتیش: دویای چەن هەفتەیگ لە مینەکردن، ئەو ماشینە لەلای ماڵیگ لە شار کەراتچی پەیا کریا.
سەرچەوەگە وتیش: دویای ئەوە دەسەڵاتەیل بەریتانیا وە (جی بی ئەس) شوینەگەی دیاری کردن، ک دزەیلە نەتوەنستنە پەکی بخەن.
دیاری کرد ک دەسەڵاتەیل پاکستان ئاگاداری لە ئاژانس نیشتمانی دژە تاوان لە بەریتانیا وەرگردن، ئەرا دەسمیەتی لە پەیاکردن ئەو ماشین دزیایە.
ماشینەگە پەیا کریاز وەلێ تابلۆی پاکستانی وەپیەو بوی، دویای ئەوە لە شمارەی شاسیەگەی ناسینەی.
خاوەن ماشینەگە لە کەراتچی نەتوەنست بەڵگەیگ بارێد تا بچەسپنێد ک خوەی خاوەنیە، تا ئەوەیش دەسگیر کریا، وخریا لێکۆڵینەوە، ک ئەویش ناو کەسیگتر دا دەسیان ک وەپی فرووشتیەسەی.
راپۆرتەیل نشان دان ک ئەوانەگ دەسیان لەناو دزیەگە بویە، توەنستنە هاوردەی ماشینەگە ئەرا پاکستان بکەن، وە بەڵگەی دیبلۆماتیکاریگ پایە بەرز لە دەوڵەتیگ لە ئەوروپای خوەرهەڵات.
