سزای لەسێدارەدان لەبان ژنیگ ئەمریکی ژنیگ دووگیانی کوشتیە تا کوورپەگەی بدزێد
شەفەق نیوز/ سزای لەسێدارەدان لەبان ژنیگ خەڵک تێکساس لە تەمەن ٢٩ ساڵان دەرچگ، لەبان کوشتن ژنیگ دووگیانی لە تەشرین یەکەم ٢٠٢٠ تا مناڵەگەی زگی درارێد و وبوەێدەی.
ئەو فەرمانە وە تاوانبارکردن تايلور بارکەر لە تیکساس دەرچگ، دویای دادگاکردنی تا ماوەی چەن هەفتەیگ.
تایلۆر وە دروو یار و کەسوکارەیل خوەی خەڵەتانیە گوایە دووگیانیە، و ئەو زگپڕی درووکانییە لە پۆستەیلیگ لەبان سۆشیال میدیا بڵاو کردیە، ک پەنامیگ وە سیلیکۆن ئەرا زگ خوەی دروس کردیە، باوجی خوەی مناڵدانی دراوردیە.
لە ئۆی تەشرین یەکەم ٢٠٢٠، بارکەر سەردان ژنیگ لە تەمەن ٢١ ساڵان کرد وەناو ریگان سیمۆنی هانکۆک، ک ئەو ژنە لە مانگ خوەی بویە لە دووگیانی، و زیاتر لە سەد گلە وەچەقوو زەخمداری کردیە، ئیجا زگی دڕیە تا مناڵەگەی درارێد.
بارکەر وە دویری ١٥ کیلومەتر لە شوین تاوانەگەی ماشینی رانیاد و ئەو مناڵە لەداوانی بویە، دەسگیر کریا، و وە پولیس وتیە هەر ئیرنگە ئی مناڵە زایمە.
ئەو کوورپە ک بریا خەسەخانە گیانی لەدەسدا.
لە دادگاکردن بارکەر لە شار نیو بۆستن، پولیس دیاری کرد ک وەرجە چەن هەفتەیگ لە تاوانەگە بارکەر کەفتیادە مینەی ئەو ژنەیل دووگیانیە.
