ریش خوەم ئەرا خوەم

یەی کوڕیگ سەرەهەرز و فرە ووڕاج هاتە لای پیای پیریگ ریشی فرە درویژ بوی.

کوڕ لە پیا بیرەگە پرسێد: خاڵوو ت وەخت خەفتن ریشد نەێدە بان پەتوو یا خەێدەی ژیری؟

پیای هویریگ کرد و گڕیگ وسیا، ئیجا وە کوڕەگە وت؛ تا ئیسە نەکفتمەسە فتراق ریشم لە وەخت خەفتن، بووسەو تا ئمشەو هەناێ خەفم تا بزانم ریشم نەمە کوو.

ئی رووژەگە، پیای کەفتە مینەی کوڕەگەی دویەکەینگ، وهەگ پەیای کرد وە گووچان دادە بان سەر و مل کوڕ.

کوڕ دەسنادە هاوار و وت: یە ئەڕا وەی گووچانە دەێد لەلیم، من چە کردمە؟.

پیای وت: یە هەفتا ساڵە وە ئاسوودە خەفم، وهویرم لەلای ریش خوەم نییە، نەفرەت لە خوەد و پرسیارەگەد، ت ئمشەو لەوەر ئەو پرسیارە کردید نەیشتید بخەفم، چوینکە هویرم لەلای ئی ریش درویژە بوی بنمەی بان پەتوو یا بخەمەی ژیری.