چیرووک ئەو ژن میسریە کە شویەگەی خوەی کوشتیە و چیەسە ناو سویر

وەگورەی توومارەیل وەڕێوەبەرایەتی ئاسایش قاهیرە، تاوانەگە لە بنکەی پولیس مەرج بویە، لەورا کارمەنەیل ئەمنی راپۆرتیگ وەپیان رەسیە کە تەرم کرێکاریگ وە ناو سەعید ئەحمەد تەمەن 39 ساڵ، کە کوورە، وە کوشیای پەیا کریایە، و فڕیدریاسە دەر ئەو بينا کە  شوقەگەیان هاناوی. 

 سەرچەوەیگ ئەمنی باس ئەو تاوانە ئەرا سکای نیوز عەرەبی کردیە کە وتیە: هەناێ پولیس رەسیە شوین رویداوەگە، تەرمەگە وە رویتی پەیا کردنە و دیارە کە کوشتنەگە چەن رووژیگ وەرجە فڕەداینی جیوەجی کریایە.

وتیش؛ دەرکەفت برا و کەسوکار قوربانییەگە لە یەک بینا نیشتنە، و هەناێ پرسیاری لەلیان کریا وتنە:  ئەو شەوە کە تەرم براگەیان پەیا کریایە، خوەیان دیر لە کار هاتنەسەو، و لە دەروازەی بیناگە هویچ تەرمیگ  نەویە.

گشت ئەو قسەیلە گومانیگ قایمتر کرد کە بکوشەگە تاوانەگە لە یەکیگ لە شوقەیل ناو بیناگە ئەنجامدایە و تا ماوەیگ تەرمەگەی هیشتیە، ئمجا فڕوی داگە، کە تەرمەگە لە شوینیگتر بویە  و دوسکردیەسە بووکردن.

لەناو  لێکۆڵینەوە و پرسیارکردن لە ژن قوربانییەگە، قسەیلی شیواشیو بوین، چوینکە سەرەتا وتیە گوایە شویەگەی دوو رووژ وەرجەیە دیاری نەمەنیە، ئیجا وتیە گوایە تەلەفۆن لە کەسیگ نەناسیاگ ئەرا شویەگەی هاتیە کە هەڕەشەی کوشتنی دایە.

 هەناێ ناو مۆبایل قوربانییەگە وەشکین، هویچ پەیوەندییگ لەناوی نەویە، و قسەی ژنەگەی راس نەویە، و هەمیش ئایا ئەرا لە دیارنەمانی بیدەنگ بویە و ئاگاداری توومار نەکردیە؟.

لەیراو گومان کەفتە بان ژنەگە، دویای ئەوەگ شوین خوین لەناو شوقەگەی پەیا کریا، کە خوەی و پیاوە قوربانیەگە و سێ مناڵیان هانە ناوی.

تا دویای پرسیارکردن و ئەو بەڵگەیلە نریا روی ژنەگە، ناچار بوی ئاشکرای کردەوە و تاوان خوەی  بکەێد کە وتیە شویەگەی خوەی کوشتیە چوینکە گومان داشتیە ژنیگ ترەک ناسێد، و پویل ئەرای خەرج کەێد.

ژنە تاوانبارەگە هەمیش وتیە؛ لە رووژ تاوانەگە بویەسە دەمەقاڵیان، چوینکە شویەگەی رازی نەویە بڕە پویلیگ وەپی بیەێد، ئەراوە چەن گلەیگ وە چەقوو زەخمداری کردیە تا ناوزگی دراوردیە، ئیجا وە گووچانیگ سەری شکانیە. 

دویای ئەوەیش تەرمەگەی لە ژیر قەرەوێڵەی ژوور خەفتن دانایە، و پانکە لەبانی خستیەسە کار تا بووەگەی نەمینێد و وەمناڵەیلی وتیە گوایە باوگیان  بیمارە، و مامەیلی تیەن ئەرا خەسەخانە بوەنەی.

 ژنەگە داوای دەسمیەتی لە برایلی کرد تا ئەو تەرمە فڕە بیەن، وەلێ برایلی رازی نەوینە ئی کارە بکەن، و هەناێ دی بوو تەرمەگە هاتە دەیشت، هەر وەگەرد شەفەق تەرمەگە وەبان پاچینە کڕانیە و فڕی داگە تا کەفتیەسە دەر بیناگە، و ئەرا خوەی چیە بخەفێد، ئیجا هەناێ خوەر دەرچگە، خەڵکەگە لەلای تەرمەگە گردەو بوینە، یەیش هاتیەسە لای وە باوگەڕوو.

وەگورەی سەرچەوەگە، پولیس برایل ژنەگە هاوردیە، کە لەو تاوانە ئاگادار بوینە و دەنگ نەکردنە، و ئەوانیش وتنە؛ ئی خوەشکمانە وەپیەو دیار نەویە پیاییگ کوشتیە، و لاشەگەی خستیەسە ژیر شەوخەفەگەی، و ئەرا خوەی چیەسە ناو ئاهەنگ سویر.