دەسکریا وە پڕۆژەیگ تەمادار ئەرا سەردەوکردن زەوی
شەفەق نيوز/ تیم زانایەیل لە زانکۆی مانشستەر، دەسکردن وە پرۆژەی پەیاکردن توانای وەکارهاوردن کاڵەوکردن هەورەیل دەریایی جویر ئامرازیگ وەختانە ئەرا سنووردارکردن دیاردەی گیرهاتن گەرمی.
ئەو پڕۆژە وەلایەن ئاژانسەیل توێژینەوە و داهێنان پیشکەفتگ بەریتانی (ARIA) سپۆنسەر کریەێد، و ئامانجی شیەوکردن چوینیەتی پاڵپشتیکردن بەشەیل نمەک دەریایی ئەرا توانای هەورەیل لە شکانن تیشک خوەر، کە دووارە تیشک خەوەرەگە وەرەو ئاسمان کلەو کەێد، و دەسمیەتی لە داوەزانن پلەی گەرمی لەبان زەوی دەێد.
هەمیش تیمەگە تەقەلا دەێد هەڵسەنگاندن کاریگەری ئی تەکنیکە لەبان کەشوهەوای جیهانی دەێد، وەگەرد چەودیاریکردن رخدارە ئەگەریەیل ژینگەیی، و ئی پڕۆژە جویر بەشیگ لە تەقەلایل وەرەو پەیاکردن چارەسەری ئەرا نواگیریکردن ئاڵشتبوین کەشوهەوا دریەێدە قەڵەم، وەتایبەت لە سای بەرزەوبوین وەردەوام لە پلەی گەرمی جیهانی.
ئەو پڕۆژە ناو (REFLECT) ئەرای نریا، و خوازێد کاریگەری بەشەیل نمەک هویرد دەریایی ئەرا بەرزکردن توانای هەورەیل ئەرا شکانن تیشک خوەر و گلەوداینی وەرەو ئاسمان بزانێد، کە هاتێ دەسمیەتی لە داوەزیان پلەی گەرمی زەوی دەێد.
پڕۆژەگە لەبان تەکنیک کاڵکردن هەورەیل دەریایی کار کەێد، کە پشت وە چویچیان بەشەیل هویرد لە نمەک دەریا لەناو هەورە نزمەیل بان زەریایەیل بەسێد.
مەزەنە کریەێد ئی کارە ریژەی شکانن هەورەیل ئەرا تیشک خوەر وەڕیژەی 5-10% بەرزەو بکەێد، کە هاتێ وەشیوەیگ وەختانە پلەی گەرمی لە ناوچەیلیگ دیاریکریای داوەزنێد، کە کاریگەرییگ فرە گرنگە ئەرا نواگیریکردن زیایبوین دیاردەی گیرهاتن گەرمی.
توێژینەوەیل سەرەتایی ئاشکرای توانای داوەزانن پلەی گەرما لە چینیگ سنووردار کەێد لەناوەین 0.5 تا 1 پلەی سەدی وەی تەکنیکە.
پڕۆفیسۆر هيو كو، سەرکردەی ئەو پڕۆژە وت: کاڵەوکردن هەورەیل جویر چارەسەرییگ وەختانەس کارەلە مدووەیل ریشەیی دیاردەی گیرهاتن گەرمی نیەکێد کە لە تەکان گازە گەرمەیل تیەێد، وەلێ شایەت پەراویزیگ وەختانە ئەرا مەردم دروس بکەێد ئەرا زویکردن لە داوەزیان تەکانەیل و چگن وەرەو سەرچەوەیل وزەی پاک.
ئەو تەکنیکە پشت وە مادەیگ سروشتی و بیوەی بەشێک کە نمەک دەریاس، کە تەمەنی کوڵە لەناو کەووڵ زەوی و وەماوەی چەن رووژیگ بنەو گرێد، ئی تایبەتمەنیە هیلێد دەسوەردان ژینگەیی کارترەو بوود.
وەلێ تۆێژینەرەیل هوشداری لە بەشیگ لە رخداریە ئەگەریەیل دەن، کە هاتێ کاڵەوکردن هەورەیل شیواشیویگ بخەێدە بان ریتم کەشوهەوای سروشتی، هەمیش هاتێ ئەنجامەیل پیچەوانەیی دروس بکەێد لە زیایکردن گەرمی ناوخوەیی هەناێ هەورەیل خەسی خوەیان لەدەسدەن.
