دیاردەی ئەڵاجەوییگ.. بویچگبوین بەرزایی کویەیگ لە واشینتۆن

شەفەق نیوز/ تیمیگ زانایەیل چشتیگ ئەڵاجەوی پەیا کردن مەوقەی لێکۆڵینەوە لە بەرزترین کویە لە واشینتۆن.

 لە روی میژووییەو بەرزی کویەی ڕینیەر ١٤ هەزار و ٤١٠ پا (٤٣٩١.٥٧ مەتر)، بەڵام زانیەیل ئەرایان دەرکەفت کە کویە گڕکانەگە لە ساڵ ١٩٩٨ەو ١٠ پا (٣٠٤٨ مەتر) بویچگەو بویە.

کەمەوبوین بەرزییەگەی  لەوەر کەمووبوین  یەخبەنی کویەنەی ڕەینیەر بویە، کە بریتییە لە کۆڵۆمبیا کرێست، کە نزیکەی ٢٢ پا (٦.٧١ مەتر) تاویاسەو.

ئەگەر ئەوە هەس زیایبوین وەکارهاوردن سزەمەنی بەردینی و بەرزەوبوین پلەی گەرمی  بەشداربویە لە لەدەسدان وەرچەویگ لە یەخەگە، کە تیم لێکۆڵینەوەکە ڕاپۆرتیگ دانە کە کویەی ڕینیەر لە ماوەی ١٢٠ ساڵ گوزەشتە ٤٢% یەخەگەی لەدەسداگە.

کویەی ڕینێر خاوەن بەرزترین لویتکەی گڕکانە لە کیشوەر ئەمریکا و گەورەترین سیستەم ئەشکەفت یەخین لە جەهانەر  بەڵام پەیاکردن ئی دواییە دیمەن باکوور خوەرئاوای زەریای هێمن ئاڵشت کرد، دویای ئەوەگ ئێریک جیلبێرتسۆن، شاخەوان و ئەندازیار میکانیکی، لە ٢٨ ئاب نووڕین نوو خوەی ڕاگەیان.

جیلبێرتسۆن لە پۆستیگ  وت: "لویتکەی کویەی ڕەینیەر گەژ کانیاوی دیرێد کە گشت تاوسانیگ تاویەێدەو و بەوودە سان، بەڵام لە روی میژووییەو، گومەزی یەخ هەمیشەیی لەبان کەژ خوەرئاوای دەم گڕکانەیەگە بویە".

 بەرزی کویەی ڕەینیەر ئەرا یەکەمجار لە ساڵ ١٩١٤ پەیمانە کریا و لویتکەی کۆڵۆمبیا وە بەرزترین لویتکەی واشینتۆن دانریا تا ساڵ ١٩٥٦، بەڵام پەیمانە نووەگەی جیلبێرتسۆن نشان دەێد کە کەژ باشوور خوەرئاوای کانییەگە لە لویتکەی کۆڵۆمبیا زیاترە. 

 بەرزی لویتکەی کویەیل واشینتۆن وە درویژایی ساڵ ئاڵشتەو بوود وە مدوو کەڵەکەبوین یەخ لە وەرز زمسان و تاویانی لە تاوسان، یەیش خوانێد زانایەیل بەرزی لویتکەیل لە نزمترین ئاست یەخبەنیەیل بەڵگەنامە بکەن.

 ئەراوە هیشت جیلبێرتسۆن لە تاوسان پەیمانەی بکەێد.

 هەرچەن پەیمانە نووەگەی جیلبێرتسۆن تا ئیسە وە فەرمی پەسەن نەکریاسر بەڵام ها ژیر لێکۆڵینەوە لەلایەن ئیدارەی پارکە نەتەوەییەگەی ماونت ڕینێرەو، کە وەی نزیکە بڕیار دەن کە ئایا وەشکین نوویگ لەبان ئەو کویە ئەنجام بیەێد یا ئەنجامەیل جیلبێرتسۆن توومار بکەێد.

 لە وەختیگ جیلبێرتسۆن ڕاستەوخۆ باس مدووەیل پشت ئی تاویانە نەکرد، بەڵام کەشناسەیل مدوو ئەو دیاردە گلەو دەن ئەرا گەرمبوین بەرگەەوا کە لە ئەنجام دەردان سزەمەنی بەردینیەو دروس بوود.

 سەرچەوە: دەیلی مەیل - ئار تی