دویای ٣٤ ساڵ لە تاوانیگ.. پەیامیگ ئاشکرای بکوشەگە کەێد

شەفەق نیوز/ پەیامیگ رەسیە سانمە رووژنامەنویسیگ لە ئەمریکا، بویە دەسمیەتدەریگ لە ئاشکراکردن چەوەچەی تاوانیگ، وەرجە ٣٤ ساڵ جیوەجی کریایە.

لەو هویردەکاریەیلە ک تووڕ سکای نیوز بەریتانی باسی کرد، ئانا کین لە ساڵ ١٩٨٨ کوشیا، هەنای تەمەنی ٢٦ ساڵان بوی، ک تەرمەگەی لە کنار ریەگە لە ویلایەت بنسلفانيا پەیا کریا.

هەنای دەسەڵاتەیل ئەمریکا دەسکردنە لێکۆڵینەوە، نموونەی (دی ئێن ئەی) لە پڕتاڵ ژنە کوشیایەگە بردن، و زانستن ک پیاویگ وەگەردی بویە، باوجی ئەو کابرا پەیا نەکریا.

لە ساڵ ١٩٩٠، رووژنامەی  (the Reading Eagle) لە ئەمریکا، باس ئەو تاوان کوشتنە کرد، و داوای دەسمیەتی ئەرا رەسین وە بندروس تاوانەگە کرد.

وەخت فرەیگ وەپی نەچگ، تا پەیامیگ لە کابرایگ نەناسریاگ وەناو "کابرایگ توومەتبار" ئەرا رووژنامەگە رەسێد، و لەناو ئەو پەیامە هویردەکاریەیل فرەیگ بوی، ک هیشت مەزەنە بکریەێد ک نویسەر پەیامەگە خوەی بکوشەگەس.

وەلی دەسەڵاتەیل هویچ رییگ نەیاشتن تا بڕەسنە خاوەن ئەو پەیامە.

دویای ٣٤ ساڵ، تەکنەلۆژیا لە ئاشکراکردن (دی ئێن ئەی) گەشە کرد، توەنست بچووە ناو باوەتەگە، ئەوەیش لە وەشکین نوویگ لە نموونەی دی ئێن ئەی.

ئەنجامەیل نشان دان ک (سکۆت گریم) بکوشەگەس، ک لە ساڵ ٢٠١٨ لە تەمەن ٥٨ ساڵان مردیە، و مەوقەی جیوەجیکردن تاوانەگە تەمەنی ٢٦ ساڵ بویە.

پۆلیس ئەمریکا وت: بەراوردی نموونەیل ناو پەیامەگە وەگەرد نموونەیلیگ لە باوەت (سکۆت) کردنی تا ئەنجامەیلی وەگەردی پووڕیاگ دەرچین.