تریشقە دوو گلە لەبانیەک دەێد لە کابرایگ چینی و لە مەرگ قورتار بوود
هەر کەسیگ دەرفەت ١ لە ١٥٣٠٠ دیرێد تا تریشقە لەلی بەێد، و هەڵبەت دەرفەت دوو گلە تریشقە بەێد لە یەک کەس فرە کەمە، ئەراوە وتنە؛ تریشقە قەت دوو گلە نیەێد لە یەک شوین، وەلێ ئی کابرای چینیە وەناو لیو نان وەیجویرە نەوی.
لیو نان پیاییگ لەناوڕاس تەمەنی، لە دەیشت ماڵەگەی بوی لە شار تسونیی لە هەرێم قویچو لە وڵات چین، مەوقەی ئەور و تریشقە، هەس کرد رووشنایی چەرمگیگ چگە ناو لەشی، و لە هووش خوەی چگ، و کەفتە بان زەوی، تا ئەوەنە دووارە چەو واز کرد تا بفامێد چە بویە، و بتواێد خوەی هیز بەێد، هەر ئەوەنە زانێد ئەو رووشناییە جاریگتر دادە لی، و هەمیش کەفت و لە هووش خوەی چگ.
ئەرا دویەم جار، وە شیوەی ئەڵاجەویبگ هاتە ئاگا، و نووڕێد ژن و مناڵەیلی لەدەوری گردەو بوینە و واقیان پەڕەیە، تا رەسینە هاناێ و ئەرا خەسەخانە بردنەی، کە لەورا پزشکەیل وتن یە دوو گلە تریشقە لەلی داگە، و قولەیلی وەگەرد کەمەری و پشتی سزیایە.
دویای ئەوە، لیو هاتە دەنگ، و وت: وەکوتپڕ لەهووش خوەم چگم، و گڕیگ دویای ئەوە هاتمە هووش، ئیجا هەر لەو شوینە دووارە رووشناییەگە چگە ناو لەشم.
