بابا نوێل سەردان شوومیگ کرد
![بابا نوێل سەردان شوومیگ کرد](https://media.shafaq.com/media/arcella/1609157175773.jpeg)
شەفەق نیوز/ ئەوەسا مێژوو ئەوە هەڵگرێد ک بابا نوێل لە ساڵ ٢٠٢٠ جوور جارانی سەوقاتی جەژنەیل زایینی ئەرا مناڵ و گەوراگان نەهاورد، بەڵکم پەتای کۆڕونا ئەرایان برد، وەوجوورەگ لە چەن ناوچەیگ روویدا، و ١٨ کەس لە یەکیگ لە ماڵە چەودیریەگان لە بەلجیکا لەوەر تووشهاتنیان وە ڤایڕۆس کۆڕۆنا مردن، ئەوەیش دویای سەردانەگەی بابا نوێل ک خوەی تووش پەتاگە هاتوێد.
رۆژنامەی دیلی میل بەریتانی وت: بابا نوێل و تیمەگەی لەوەختیگ گوزەیشتە لەی مانگە پەتاگە دانە ١٢١ کەس لەناو ماڵە چەودیریەگە لە شار ئەنتوێرب و هەمیش ٣٦ کارمەن لەناوی.
کەسەیلیگ لە پۆستەیل تویتەر گلەیی خستنە بان بابا نوێل ، دویای بڵاوبوین وێنەیلیگ لەناو ماڵەگە وەرجە دوو هەفتە، وەگەرد تۆمارکردن زیایبوینیگ لە مردنەگان لەناو دامەزراوەگە.
دویای ٣ رووژ لە سەردانەگە ئاشکرای تووشهاتن بابا نوێل وە ڤایڕۆسەگە کریا، ک هیشت وەرپرسەیل ماڵەگە دەسبکەنە تاقیکردنەوەیل خەسیگ ئەرا نیشتەجییەگان.
لە ئەمریکا، بابا نوێل و ماما نوێل هاوسەری لە وەلایەت جۆرجیا وەبی ئاگایگ وەخوەیان تووش ڤایڕۆس کۆڕۆنا هاتن، ک بویە هووکار کەرەنتین کردن دەیان لە مناڵەیل و دابڕینیان لە خوەنستن تا ماوەی دوو هەفتە.
لەوەخت دووپاتکردن لە تووشهاتن بابا وماما نوێل، وەکوتپڕ زیاتر لە ٥٠ مناڵ تا ماوەی ١٤ رووژ کەرەنتین کریا.