نەفت بەرزەو بوود لەناو نادیارییگ لەباوەت وازکردن هورمز

شەفەق نیوز- بەغداد

نرخەیل نەفت، ئمڕوو دووشەممە، بەرزەو بۊن، لەناو رەوشیگ لە بی دڵنیایی لەباوەت وەخت وازکردن گەروو هورمز، وەگەرد وەردەوامبۊن نادیاری لەباوەت رەسین وە رێککەفتنیگ کە دووارە دەسکردن وە جۊلەی بارهەڵگری لەڕی رێڕەو ئاوییەگە مسۆگەر بکەێد.

گرێبەسەیل ئاییندەیی ئەرا نەفت خاو برێنت 91 سەنت، یا 1.09% زیاد کردن، تا رەسیە 84.46 دۆلار ئەرا هەر بەرمیلیگ، لە وەختیگ نەفت خاو خوەراوای تەکساس ناوەنجی ئەمریکی 61 سەنت، یا 0.78% بەرزەو بۊ، تا رەسیە 78.79 دۆلار ئەرا هەر بەرمیلیگ.

ئی بەرزەوبۊنەیلە هاتن دۊای ئەوەگ نرخەیل نەفت خاو وە زیاتر لە 7% لە هەفتەی گوزەشتە داوەزیان، وەگەرد ئومیدەیل وە رەسین وە رێککەفتنیگ لە ناوەین ئیران و سەڵتەنەی عومان کە ری خوەش بکەێد ئەرا وازکردن گەروو هورمز، کە وەرجە جەنگەگە نزیکەی یەک لە پەنجەمین دابینکردنەیل نەفت جەهانی وەپیەو رەد بۊاد.

 ئیران وت کە رێککەفتنەگە وەگەرد سوڵتاننشین عومان لەباوەت دیاریکردن رێڕەوەیل بارهەڵگری نوو رەسیەسە قۆناغەیل کووتایی، وەلی دووپات کرد کە وازکردن رێڕەوە ئاوییەگە هێمان بەسیاس وە جیوەجیکردن مەرجەیل ترەک، کە یەیش رەوش بی دڵنیایی لە بازاڕەیل نەفت دروس کرد.

 گەورە شیەوکەرەیل بازاڕ لە کۆمپانیای KCM Trade، تیم وۆتەرەر، وت کە بازرگانەیل چەوەڕی بەڵگەیل هەسوەپیکریاگ کەن لەبان وازکردن گەرووەگە، جۊر جۊلەیل کەشتیەیل بارهەڵگر نەفت یا رێککەفتنەیل فەرمی، وەرجە وازهاوردن لە قەرەبوو رخباریەیل لە نرخەیل نەفت خاو.

 لە پیشهاتیگ ترەک کە شایەت کاریگەری بکەێدە بان دابینکردنەیل نەفت، پاڵاوگەی جازان سەر وە کۆمپانیای ئارامکۆی سعودی تۊش پەلاماریگ هات لەماوەی پشوو کووتایی هەفتە، لە وەختیگ کۆمپانیای ئەدنۆک ئیماراتی وت کە 15 لە کەشتییەیلی تۊش پەلامارەیل هاتنە لە وەخت رەدبۊنیان لە گەروو هورمز لە سەرەتای ناکۆکییەگەو.