فراكسيۆن سه‌در: ده‌سدريژی له‌بان خوه‌ينيشانده‌ره‌يل نه‌بايه‌د بی پرس وپرسكاری ڕفوو بوود
حسێن شه‌ريفی ئه‌ندام فراكسيۆن ناوبرياگ له به‌ياننامه‌يگ له‌لايه‌ن نويسينگه‌ی ره‌سانن ئه‌حراره‌و ك روينويسيگی ره‌سيه(شه‌فه‌ق نيوز)وت: ئه‌و خوه‌ينيشانداينه‌يله ك دويه‌كه له گشت پاريزگايه‌يل ئه‌نجام دريان ئاشتيانه‌و ياسايی و ڕه‌وا بوین و له‌تیان داوای هه‌قه‌يل ملله‌ت كريا، چوينكه ملله‌ت بوی ك متمانه دا په‌رله‌مان رای خوه‌ی نيشان بيه‌يد نه‌ك دارايی بفه‌وتنيد.
شه‌ريفی له‌و به‌ياننامه يه‌يش ده‌رخست ك خوه‌ينيشانداينه‌يل دويه‌كه ئاشكرا بويه‌و مه‌رامی هويچ لايه‌نيگ نه‌ويه، وه‌لی ئه‌و ده‌سدريژيه ك كريا بان خوه‌ينيشانده‌ره‌يل نه‌يايه‌د هه‌ر ئيچنه وه‌مفت وئاسان رفوو بوود وه‌بی پرس وپرسكاری.
جی باسه، شماره‌يگ له خوه‌ينيشانده‌ره‌يل له‌لايه‌ن هيزه‌يل"سوات"و هيزه‌يل تر حكووميه‌و له شار ناسريه زه‌خمدار كريان، ك خوه‌ينيشانده‌ره‌يل له‌و خوه‌ينيشانداينه داوای لاوردن موچه‌ی خانه‌نشينی ئه‌ندامه‌يل ئه‌نجوومه‌ن و هه‌رسێ سه‌رۆكايه‌تی و ئه‌ندامه‌يل ئه‌نجوومه‌ن ناوچه‌يی كردن و ته‌نانه‌ت له به‌غدای پايته‌ختيش نواگيری له‌ليان كرياو ڕێ وه‌پيان نه‌دريا بڕه‌سنه شوونه‌يل گرده‌وبوين ئه‌را ده‌رخستن داواكاريه‌يليان.
ج . أ
