کەشناسی جەهانی زەنگ رخداری لە ئاڵشتبوین کەشوهەوای ساڵ 2024 کوتێد
شەفەق نیوز/ ئمڕوو دووشەممە، ریخریاگ کەشناسی جەهانی نەتەوە یەکگرتگەیل لە ڕاپۆرتەگەی ساڵ ٢٠٢٤ دووراە لەبان ئاڵشتبوین کەشوهەوا هوشداری دا.
ریخریایەگە بەرزترین ئاست هوشداری دا لەباوەت "دەرئەنجامەیل ئاڵشتبوین زویوەزوی کەشوهەوا لە ماوەی یەک نەوە" لە ناو پیشکەشکردن ڕاپۆرتەگەی لەبان پلەیل گەرمای جەهان ئەرا ساڵ ٢٠٢٤.
ریخریایەگە لە کۆنفرانس کەشوهەوای نەتەوە یەکگرتگەیل لە باکۆ ڕاپۆرت خوەی دا کە “تێکڕای پلەی گەرمی جەهانی رەسیە بەرزترین ئاستی ١.٥٤ پلەی سەدی لە ئاست وەرجە پیشەسازی لە ناوەین ساڵەیل ١٨٥٠ تا ١٩٠٠.”
توێژەرەیل ریخریاگ کەشناسی جەهانی “کەمی دڵناییان وەوە نشان دان کە تا کۆتایی ئمساڵ ئاڵشتکاری گەورە بوود”.
جی باسە کە “رێککەفتن کەشوهەوای پاریس لە ساڵ ٢٠١٥ ئامانجیگ دانا ئەرا سنووردارکردن بەرزبوین تێکڕای پلەی گەرمی درویژماوە ئەرا ١.٥ پلەی سەدی.”
وەگورەی ریخریاگ کەشناسی جەهانی، “بەرزەوبوین مامناوەندی پلەیل گەرما ئیسە وەگورەی ئی پێوەرە 1.3 پلەی سەدییە”.
سکرتێر ریخریاگ کەشناسی جەهانی وت: "ئەو وارانبارینە و لافاوەیلە کە شمارەیگ پەیمانەیی و زویترکردن زریانە گەرمەیل، گەرمای کوشندە، هشکەساڵی وەردەوام و ئاگرکەفتن لە دارستانەیل کە ئمساڵ لە ناوچە جیاجیایل جەهان دیمنە، وەداخەو راسیانەی نوویگ نشانمان دەن و نموونەس لەوەگ لە بانان چەوەڕیمان کەێد".
