کۆڕۆنا گیان وەرپرسیگ سینێ
شەفەق نیوز/ وەرپرسیگ پزشکی، ئمڕوو دووشەممە، خەوەردا لە مردن وەرپرسیگ لە تەندروسی پارێزگای بابل دویای تووشهاتنی وە ڤایڕۆس کۆڕۆنا.
سەرچەوەگە ئەرا ئاژانس شەفەق نیوز وت: حوسام شرێفی وەرپرس کادر پەرستاری لە رەدهەی پەتا لە خەسەخانەی سادق لە پارێزگای بابل ئمڕوو کۆچ دویایی کرد، لەوەر تووشهاتنی وە ڤایڕۆس کۆڕۆنا.
سەرچەوەگە هەمیش وت؛ مردنەگەی لەوەخت خەفتنی لە خەسەخانەی نەشتەرگری حلە بوی.
وەزارەتەگە رووژ شەممە ١٣ حوزەیران ٢٠٢٠ راگەیان ك ٥ تووشهاتگ نوو وە ڤایڕۆس کۆڕۆنا لەناو کادرە پزشکەیل وتەندروسیەیل لە پارێزگای نەجەف تۆمار كریا.
جی باسە ک سەندێکای پزشکەیل عراق لە وەختیگ وەرین راگەیان، ک فرەترین پارێزگا لە ژمارەی تووشهاتن ناو کادرە پزشکەیل خوەی بەغدادە وە ١٧٠ تووشهاتگ، ئیجا بەسرە ٣٧ ، ئیجا کەربەلا وە ٢٧ تووشهاتگ، ودیاری کرد ک رێژەی تووشهاتنەگان ئەرا ناونیشانە فەرمانبەریەگان لە چین نۆرە جیگرەیل ١٢٢ تووشهاتگ بوی، ئیجا چین جیگرەیل کۆن ١١٢ تووشهاتگ، وپێشبینی وە بەرزەوبوین تووشهاتنەگان کرد لە روژەیل هاتگ.
