کورد دیالە چەوڕی یەکسانی له بڕیار كه‌ن
شەفەق نیوز/ وەرپرسەیل کورد لە پارێزگای دیالە، ئمڕوو دووشەممە، دووارەی داواکاریان کردن وە وەرگردن شایستە مافه‌گانیان لە سیستم وەڕیەوبردن پارێزگاگە، و رخنە گرتن له دویرەوخستنیان لە وەڕیەوبردن دامەزراوەیل پارێزگاگە ك لە ساڵ ٢٠٠٣ وه جیوه‌جی كریاس .
پێکهاتە کوردەگە چەوەڕی جیوەجیکردن بڕیار ئاڵشتکردن لە وەڕیەوبردن فەرمانگەیل دیالە کەن، ئەوەگ پارێزگار وە هەماهەنگی وەل سەرۆک وەزیران رایگەیان، ئەرا هاوردنەوەی هاوسەنگی نەتەوەیی پارێزگاگە وەگورەی شایستەیل سیاسی و ژماره‌ی نیشته‌جایه‌یل.
سەرچەوەیلیگ حکومەتی لە دیالە دووپات کردن ک ئاڵشبوینیگ فرە ، وەڕیەوبەری فەرمانگەیل گریدەو، ک گوشاره‌یل سیاسی وتایفی وکاریگەری حزبی نەهیشت ئاڵشت بکریەێن.
کەریم ئاغا زەنگەنە جیگر پارێزگار دیالە لە یەکێتی نیشتمانی کوردستان ئەرا ئاژانس شەفەق نیوز وت؛ چەوەڕی بڕیار وەڕیەوبەرایەتی پارێزگاگە کەیمن، دەربارەی ئاڵشتکردن وەڕیەوبەر فەرمانگەیل، وئەنجام کۆبونەوەی پارێزگەرەگە وەل سەرۆک وەزیران لەی باوەتە، وتیش؛ کورد بیبه‌شكریاس لە وەڕیەوبردن هویچ فەرمانگەیگ لە پارێزگاگە، چ لە مەدەنی چ لە دامەزراو سەربازی و گشت بەشەیل تر.
زەنگەنە هەمیش وت؛ داواکاریەیل هاوپەیمان کوردستانی لە دیالە، لە لاین ماف دانیشتوه‌یل وەگورەی ئەو پێکهاتەگان تر، رەد نیه‌کریەێد، چوینکە کورد پێکهاتەی سەرەکیە، وهەژماریان لە دیالە 250 هەزار کەس رەدکەێد.
لای خوەییش شێرکۆ میروەیس نوێنەر دیالە لە یەکێتی نیشتمانی کوردستان وت؛ به‌شه نوێنەرایەتی وەڕیەوبردن کورد وەئاست تەما نیە، ودویرە لە شایستەگانی، و لە ڕی ئاژانس شەفەق نیوز ئاشکرا کرد ك هاوپەیمان کوردستانی ئەرا وەرگردن مافەیلی، وەهەماهەنگی وەل وەڕیەوبەرایەتی پارێزگاگە، وەگورەی شایست فەرمی وه‌راسی هەوڵ ده‌ید .
میروەیس دووپات کرد؛ ک کورد چەوەڕی رێوشوێن هاوسەنگی وەڕیەوبردنن لە پارێزگاگە ، و بەشەوکردن وەڕیەوبردن لەناوچگەگە. چمان لەساڵ 2003 وە تا ئیسە، کورد شایستەی خوەی وەرنەگردگە لە گشت حکومەتەیل خۆجێی و لە شوین یەک لە دیالە.
لای خوەییش ئازاد حەمید شەفی نوێنەر کوردی لە فراکسیۆن نەهج نیشتمانی جەخت کردە بان گرنگی راسەوکردن وەڕیەوبردنەگە لە دیالە، وەگورەی شایستەیل نەتەوەیی ودانیشتویی، وتیش؛ بەش وەڕیەوبردن کورد نەگونجیاگە وەل دروسکردن هەر حکومەتیگ خۆجێی لە ٢٠٠٣ تا ئیسە، یەیش کاریگ غه‌مناكه.
شەفی لە قسەگەی ئەرا ئاژانس شەفەق نیوز وت؛ سەرۆک وەزیران ئیسە دویرە لە بەشبەشەکی حزبی، وئومید یەکسانی وئەنجامدان هاوسەنگیگ رێکانە لەلی دیرێمن، ک بگونجیەێد وەل سروشت و پێکهاتەی دانیشتوان دیالە، ک وە عراقیگ بویچگ دانریەێد، تا له پرۆسه‌ی سیاسی و دیموکراتی ئەرا هاووڵاتیەیل لە گشت نه‌تەوەگان دڵنیایی بارێدەو.
موسەنا تمیمی لە وەختیگ وەرین داوا لە موستەفا کازمی سەرۆک وەزیران کرد وەدەسوەردان وئاڵشت کردن وەڕیەوبەرەیل کۆنە جیگر لەناو فەرمانگەیلیان ك پشتبەسانه وە بەشبەشەکی حزبی، ک ١٠ – ١٥ ساڵ لە پۆستەیلیان گوزران كه‌ن. وەرپرسەیل و ئەکادیمیەگان دیالە رخنەگرن لە وەردەوامی بڕیگ لە وەڕیەوبەرەیل فەرمانگە خزمەتیەگان لە پۆستەیلیان ئه‌را فرەتر لە ١٠ ساڵ، هەرچەن شکست و کێشە هاوردنە ک گشت وەپی زانن.
