په‌روه‌رده‌ى كوردستان نمره‌ى بريار كرده 10 ئه‌را گشت قۆناغه‌يل خوه‌نين
شه‌فه‌ق نيوز/ ئالان حه‌مه سه‌عيد وه‌زير په‌روه‌رده له حكومه‌ت هه‌رێم كوردستان، ئاشكراى ئه‌وه كرد نويسرياگيگ فه‌رمى ئاراسته‌ى گشت وه‌ڕيه‌وبه‌رايه‌تيه‌يل په‌روه‌رده كردگه و رێ وشوونه‌يل تازه‌يگ گرته‌سه خوه‌ى، له‌وانه‌يش به‌رزه‌وكردن نمره‌ى بڕياره ئه‌را 10 ئه‌را گشت قۆناغه‌يل خوه‌نين.
سه‌عيد له به‌ياننامه‌يگ ئه‌را ئاژانس شه‌فه‌ق نيوز وت: وه‌ڕيه‌وبه‌رايه‌تى گشتى تاقيكردنه‌يل له وه‌زاره‌ته‌گه نويسيرياگيگ فه‌رمى ئاراسته‌ى سه‌رجه‌م وه‌ڕيه‌وبه‌رايه‌تيه‌يل گشتى په‌روه‌رده كردگه و له‌تى رێ وشوونه‌يل تازه‌يگ په‌سه‌ن كردگه ك له‌لايه‌ن ئه‌نجومه‌ن وه‌زيره‌يل بريار له‌بانيان درياگه.
باس له‌وه‌يش كرد يه‌كيگ له‌و برياره‌يل به‌رزه‌وكردن نمره‌ى بڕياره ئرا پۆله‌يل له 4 بنه‌ڕه‌تى تا 11ى ئاماده‌يى ك له 5 نمره‌وه ئه‌دێده 10 نمره.
هه‌ميش وت: قوتابيه‌يل و خوه‌ندكاره‌يل فۆناغ 12ى ئاماده‌يى ك ماف به‌شداربوين ئه‌را تاقيكردنه‌وه‌ى ئه‌زموونه‌يل وه‌رنه‌گرتنه، ته‌نيا له‌و وانه‌يله تاقيكردنه‌وه ئه‌كه‌ن ك له‌وه‌رز يه‌كه‌م له‌ليان ده‌رنه‌چينه.
