وینە.. وازکردن دوو خەسخانەی نوو لە سلێمانی
شەفەق نیوز/ قوباد تاڵەبانی جیگر سەرۆک حکومەت هەرێم کوردستان، ئمڕوو یەکشەممە، دوو خەسخانەی نوو لە پارێزگای سلێمانی واز کرد.
تاڵەبانی لە کۆنگرەیگ رووژنامەوانی ئاژانس شەفەق نیوز ئامادەی بوی وت: سوپاس گشت ئەوانە کەم ک کار لەبیانکردن ئی دوو خەسخانە کردن، وگشت کارمەنەیل کەرت تەندروسی، هەمیش ئەرا رەنجیان لە خزمەت هاووڵاتییەیل تایبەت مەوقەی بڵاوبوین ڤایرۆس کۆرۆنا وئیسە وەگەرد بڵاوبوین بیماری کولێرا سوپاسیان کەم.
وتیش: کارمەنەیل کەرت تەندروسی کەفتنە وەر سەختیەیل گەورەیگ، و لەبان ئەوەیش خوەیڕاگری خوەیان لەنوای سەختیەیل تەندروسی چەسپانن، وئیمە سسپاس ئەو هاووڵاتییەیلیشە کەیمن ک پاڵپشتی کەرت تەندروسی کردن.
تاڵەبانی وتیش: ئمڕوو دوس خەسخانە واز کردیمن ئەوەسا خزمەتەیل گەورەیگ ئەرا هاووڵاتییەیل پێشکەش کەن، و ئیمە لە حکومەت هەرێم کوردستان گرنگی گەورەیگ دەیکنە کەرت تەندروسی و پێشکەشکردن خاسترین خزمەتگوزاری ئەرا خەڵکەگە، وسوپاس گشت ئەو کەسەیلە کەیمن ک پالپشتیمان ئەرا گەشەپیدان کەرت تەندروسی کردن.
لە کۆتایی وتیش: ژیربینایل تەندروسی گەورەیگ لە هەرێم کوردستان دیریمن، ولەبان گشت ئەو قەیرانەیل تەندروسیە ک کەفتنە ری هەرێم کوردستان، باوجی حکومەت لە گەشەپیدان کەرت تەندروسی هەر وەردەوام بوی.
لەلای خوەییش، سامان بەرزنجی وەزیر تەندروسی لە حکومەت هەرێم کوردستان، لە وتارەگەی دیاری کرد ک دوو خەسەخانەگە یەکیگیان ئەرا بیماریەیل هەرسکردن و جگرە، وئەوەکە ئەرا مناڵە.
وتیش: وازکردن دوو خەسخانە لەی رەوشەیلە وە ئەنجام گەورەیگ ئەرا کەرت تەندروسی دریەێدە قەڵەم، ک هەسی خەسەخانیگ تایبەت وە بیماریەیل سیستەم هەرسکردن وجگر، ئەنجام گرنگیگە، چوینکە ئی باوەتە گرنگی خوەی دیرێدز وەگەرد ئەوەیش ک ئی خەسەخانە ئەوەسا بوودە بنکەیگ راوێژکاری ئەرا ئی بیماریەیلە، وحکومەت هەرێم نیاز وازکردن پەیمانگەیگ ئەرا ئی پسپۆڕیەیل هویردە دیرێد.
وتیش: لەباوەت خەسەخانەی هووکارەی تایبەت وە مناڵ، ئەوەسا ئەو قەرەباڵغیە لەبان ئەو خەسەخانەیل سووکەو کەێد، ک رووژانە خەسەخانەیل نزیکەی ١٠٠ مناڵ وەرگرن، و نزیکەی ١٥٠ مناڵ خەفتن ناو هۆڵەیلیگ تایبەت خوازن، و ئەوەسا ئی خەسەخانە زوور لەبان خەسەخانەیل مناڵ سووکەو کەێد.
بەرزنجی دەسخوەشی لە رەنج کارمەنەیل کەرت تەندروسی لە کوردستان وەگشتی ولە سلێمانی وەتایبەت کرد، ئەرا ئەو تەقەلایلە وئامانج هەڵسیان وە کەرت تەندروسی ئەرا ئاستەیل بەرزیگ.
و دیاری کرد ک لەبان ئەو زوورە ک کەفێدە بان کەرت تەندروسی لە ماوەی پەنج ساڵ گوزەشتە لە قەیران دارایی وزیایبوین شمارەی ئاوارەیل و بڵاوبوین پەتاکان، باوجی کەرت تەندروسی لەنوای ئەو سەختیەیلە وسیا و تەقەلایگ ئەرا نواگردنی نەخستە پشت دەس، یەیش وەخاسی پاڵپشتیکردن سەرۆک حکومەت هەرێم کوردستان وئەنجومەن وەزیرەیل و خەیرخوازەیل لە خەڵک کوردستان، وەگەرد وسیام خەڵکەگە وەگەردمان و شیوەیل جیاجیایان، هەمیش سوپاس گرووپ کۆمپانیای قەیوان کەم ئەرا ئەنجامدان خەسەخانەی بهماریەیل سیستەم هەرسکردن ک وە ئەنجام گەورەیگ لە کوردستان دریەێدە قەڵەم.
لەلای خوەییش، سەباح هەورامی وەڕێەوبەر گشتی تەندروسی سلێمانی لە کۆنگرەگە وت: خەسخانەی سیستەم هەرسکردن وجگر یەکەمە لەی چینە لە ئاست هەرێم کوردستان ودویەمە لە ئاست عراق ئەرا چارەکردن بیمارەیل سیستەم هەرسکردن و جگر، ک خەسخانەگە شمارەی گەورەیگ لە ئامێر و خوازینەیل پزشکی لەناوی هەس، وئەوەسا خزمەتەیل گەورەیگ ئەرا خەڵک شار سلێمانی وەشیوەی تایبەت وخەڵک هەرێم کوردستان وە گشتی پیشکەش کەێد.
وتیش" خەسەخانە دویەمەگە خەسخانەی مناڵە ک گەشەدارە وئەوەسا هاوماڵی وەگەرد گشت خەسخانەیل مناڵ تایبەت لە پارێزگاگە کەێد، چوینکە کادرەیل خەسەخانەگە ئەزموون زانستی دیرن.
هەورامی وتیش: بوودجەی گەشەپیدان خەسخانەی مناڵەیل لەلایەن وەزارەت تەندروسی حکومەت هەرێم کورستان بوی، و گەشە وەپی کریا تا رەسیە ئاست سێیەم لە عراق و کوردستان لەلای پیشکەشکردن خزمەتەیل.
