وەزیر ناوخۆی هەرێم ئاڵشتکردن لە قەیەغەەگە راگەینێد
شەفەق نیوز/ ڕێبەر ئەحمەد وەزیر ناوخۆی هەرێم کوردستان، ئمڕوو یەکشەممە، راگەیان ئەوەسا دەسەی باڵای نواگردن ڤایڕۆس کۆڕۆنا ئاڵشتەیلیگ لەبان نیمچە قەیەغەگە کەێد وەشیوەیگ ک وەگەرد مانگ رەمەزان بگونجیەێد.
وەزیرەگە لە کۆنگرەیگ رۆژنامەوانی ئمڕوو لە پارێزگای هەولێر وت: فرەی چالاکی و جمووجول مەردمەگە لە مانگ رەمەزان شەوانە دەس وەپیکەێد، ئەراوە دەسەی باڵای بڕیار دا ئمڕوو کۆبونەوەیلی بکەێد، و دیاری کرد ک دویای خوەنستن راپۆرتە پزشکیەگە لەلایەن وەزارەت تەندروسی، بڕیگ لە بڕیارەیل دەرچوود ک هیلن وەقەیدان لەناونی هاووڵاتییەیل بڕەسێدە کەمترین ئاستەیلی.
هەمیش وت: بی گومان ئەوەسا ئاڵشتەیلیگ کەفنە بان قەیەغەی هاتووچگنەگە وەو شیوە ک وەگەرد مانگ رەمەزان بگونجیەێد، وتیش؛ قەیەغەگە وەی شیوەیە وەردەوام نێەوود، و ئمڕوو بڕیار دەیمن کام لە شوونەیل وە واز مینێد، و کامیان بەسیەێد.
لە باوەت وازکردن مزگەفتەیل لە مانگ ڕەمەزان، وەزیرەگە وت: ئی باوەتە لە کۆبونەوەگەی ئمڕوو دەسەی باڵا باسی کریەێد، و ئەوەسا بڕیارەیلیگ وەگورەی بەرژەوەنی گشتی بریەن.
