وە دەسپێشخەری نێچیرڤان بارزانی.. دووارە ئامادەکردن باخچەی پێشمەرگە لە هەولێر (وينه)
2026-10-09T11:37:45+00:00
شەفەق نیوز - هەولێر
دەزگای "روانگە" رسوومەیل کووتاییهاتن پرۆژەی خاسەوکردن و ئامادەکردن باخچەی پێشمەرگە لە شار هەولێر پایتەخت هەرێم کوردستان وەڕیەو برد، وە ئامادەبۊن پارێزگار هەولێر ئومێد خۆشناو، و شمارەیگ لە وەرپرسەیل حزبی و حکومی، و دانیشتگەیل ناوچەگە.
دەزگاگە لە بەیاننامەیگ فەرمی دیاری کرد، کە کارەگە ئەرا ماوەی سێ مانگ وەردەوام بۊ وە دەسپێشخەرییگ کەسی لە سەرۆک هەرێم نێچیرڤان بارزانی، و خاسەوکردن و ئامادەکردن گۆڕەپان وەرزشی باخچەگە کە رووبەرەگەی نزیکەی 5,000 مەتر دووجایە لەخوەی گرد، بیجگە لە سێ گۆڕەپان ئەرا بازی مناڵەیل وە رووبەریگ گشتی کە لە 1,230 مەتر دووجا رەد کەێد.
