وە بەشداری زیاتر لە 200 پزشک و شارەزا.. سلێمانی ئامادەکاری ئەرا یەکەم کۆنگرەی ناودەوڵەتی ئەرا شێرپەنجە کەێد
شەفەق نیوز- سلێمانی
شار سلێمانی ئامادەکاری کەێد ئەرا میوانداری یەکەم کۆنگرەی ناودەوڵەتی پسپۆڕ وە بیمارییەیل شێرپەنجە، وە بەشداری زیاتر لە 200 پزیشک و توێژەر و شارەزا و وەرپرس لە کەرت چەودیاری تەندروسی لە ناو و دەیشت عراق، لە وەختیگ ئیدارەی خەسەخانەی "هیوا" خەوەردا لە پلانەیل ئەرا فراوانکردن خزمەتگوزارییەیل چارەسەرکردن بیمارەیل و وازکردن سەنتەریگ پسپۆڕ نوو لە ئیدارەی راپەڕین.
وەڕێوەبەر خەسەخانەی "هیوا"، دکتۆر یاد نەقشبەندی، لە کۆنگرەیگ رووژنامەوانی کە ئاژانس شەفەق نیوز ئامادەی بۊ، وت کە "کۆنگرەگە لە رووژەیل چوارەم و پەنجەم لە شوبات/ فێبرایەر 2027 لە شار سلێمانی ساز کریەێد، و رووشنایی خەێدە بان خوەیپاراستن لە شێرپەنجە و ئاشکراکردن زۊیگ ئەرای و ریەیل چارەسەری، بیجگە لە توێژینەوە زانستییە نووەیل لەی بوارە".
نەقشبەندی هەمیش وت کە کۆنگرەگە ئامانج دیرێد ئەرا "قایمکردن پێگەی سلێمانی چۊ سەنتەریگ وەرەونواچگ ئەرا خزمەتگوزارییە پزیشکییەیل، و فراوانکردن بازنەی هەماهەنگی ناودەوڵەتی لە بوار چەودیاری و چارەسەری بیمارەیل شێرپەنجە"، و دیاری کرد کە سازکردنی وە سەرپەرشتی وەڕێوەبەرایەتی گشتی تەندروسی سلێمانی و سندووق شێرپەنجە بوود، و وە هەماهەنگی وەگەرد زانکۆی سلێمانی و رێکخراو "ئێلیت".
دیاری کرد کە گشت سەنتەرە پسپۆڕەیل وە چارەسەری شێرپەنجە لە هەرێم کوردستان و عراق بەشداری لە کۆنگرەگە کەن، لە شان سازکردن وۆرکشۆپەیل کار زانستی پسپۆڕ، وە دەسنشانکردن ئەرا بۊین تەقەلایەیل ئەرا هاوردن خزمەتگوزاریەیلیگ کە پشت وە تەکنیکەیل زیرەکی دەسکرد بەسن لە بوار چەودیاری بیمارەیل شێرپەنجە.
وەقسەی نەقشبەندی، کۆنگرەگە بەشداریکردن زیاتر لە 200 پزیشک و توێژەر و شارەزا و پسپۆڕ ناودەوڵەتی و سەرکردە لە کەرت چەودیاری تەندروسی وەخوەی دوینێد، وە ئامانج ئاڵوگۆڕکردن شارەزاییەیل و وەرەونوابردن شیوازەیل خوەیپاراستن و دەسنشانکردن و چارەسەری، بیجگە لە بەرزەوکردن ئاست هوشیاری کۆمەڵایەتی وە بیماریەگە.
دووپات کرد کە ئیدارەی خەسەخانەگە "وە شیوەیگ راسگانی کار لەبان فراوانکردن بازنەی خزمەتگوزارییەیلی و وەرەونوابردنی کەێد"، و باس سازکردن کۆنگرەگە کرد چۊ "هەنگاویگ نوو و گرنگ لە رێڕەو چارەسەری بیمارەیل شێرپەنجە" کرد، لە وەختیگ ئیدارەی خەسەخانەگە تەقەلا دەێد ئەرا وەردەوامبۊن لە وەرەونوابردن خزمەتگوزارییەیلی و پارێزگاریکردن لە پێگەی خوەی ناوەین سەنتەرە پسپۆڕەیل لە هەرێم کوردستان و عراق.
لە چوارچیوەی پلانەیل فراوانکردن خزمەتگوزارییە پزیشکییەیل لە دەیشت سلێمانی، نەقشبەندی ئاشکرا کرد کە "لەبان رێنمایی جیگر سەرۆک حکومەت هەرێم کوردستان قوباد تاڵەبانی، بەشیگ سەروە خەسەخانەی هیوا چۊ سەنتەریگ پسپۆڕ ئەرا چارەسەری شێرپەنجە لەناو سنوورەیل ئیدارەی راپەڕین واز کریەێد"، وە ئامانج نزیکەوکردن خزمەتگوزارییە پزیشکییە پسپۆڕەیل لە بیمارەیل و کەمەوکردن بار قورساییەیل چگنیان ئەرا شار سلێمانی.
