وە ئامادەبوین بلاسخارت.. سەرۆک هەرێم کوردستان حزبەیل کورد گردەو کەێد ئەرا باوەت هەڵوژاردن پەرلەمان

شەفەق نیوز/ فەوزی حەریری سەرۆک دیوان سەرۆکایەتی هەرێم کوردستان، ئمڕوو دووشەممە، ئاشکرای گردەوبوین سەرۆک هەرێم کوردستان وەگەرد هیز و حزبەیل کوردستانی کرد، ئەرا باسکردن لە ئەنجامدان هەڵوژاردن پەرلەمان کوردستان.  

حەریری ئەرا ئاژانس شەفەق نیوز وت: گردەوبوینەگە وە ئامادەبوین جینین بلاسخارت نوینەر نەتەوە یەکگرتگەیل لەناو بینای سەرۆکایەتی هەرێم ئەرا رووژ چوارشەممەی ئایندە کریەێد.  

وتیش: گردەوبوینەگە تایبەت ئەرا باسکردن لە هەڵوژاردن پەرلەمانی لە کوردستان وەگەرد باوەتەیل گیرهاتگ ناوبەین هیزەیل کورد بوود. 

وەرجەیە، نێچیروان بارزانی سەرۆک هەرێم کوردستان، لە ١٤ شوبات گوزەشتە، فەرمانیگ واژوو کرد وە دیاریکردن رووژ یەک تەشرینی یەکەم ئەرا ئەنجامدان هەڵوژاردن خول شەشەم پەرلەمان کوردستان.