کوشیان و زەخمداری  چوار منال لە پەنابەرەیل سوریا وە رمیان دیواریگ لە هەولێر

شەفەق نيوز/ دوو مناڵ کوشیان، و دووان تر زەخمدار بۊن، گشتیان لە پەنابەرەیل سوڕیین، ئەوەیش وە رمیان دیوار کۆنەیگ کەفتە بانیان لە ناحیەی کەسنەزان لە شار هەولێر، وەگورەی قسەی وەچەودیەیلیگ، ئمڕوو شەممە.

وەچەودیەیلە ئەرا ئاژانس شەفەق نیوز وتن: رووداوەگە نیمەڕو ئمڕوو قومیا، هەنای مناڵەکە لەناو ماڵەگە بازی کردیان، دیوار تەیمانەگە رمیا بانیان، ک بۊە هووکار کوشیان دووان لەلیان و زەخمداری دووان تر، ک خوەیان خەڵک شار کۆبانی لە کوردستان سوریا بۊن.

وتنیش: یەکەم مناڵەکە ناوی مەحمود بوی لە تەمەن یەک ساڵان، و دۆیەمەگە دۆەتیگ بۊی وەناو هێلین لەتەمەنی ساڵ و نیمەیگ.

وەچەودیەیلە وتنیش؛ فرە جار هوشداری ئی خیزانە لە رمیان ئی دیوارە کریاگە، باوجی چۆنکە هن هاوساگە بۆە، و ڕازی نەۊیە تا بڕمیەێد و دووارە بینای بکریەێد.

لەلای خوەییش؛ مامەی دوو مناڵە قوربانیەیلە، ک ناوی خەلیل کۆبانییە، ئەرا ئاژانس شەفەق نیوز وت؛ چەن جاریگ هوشداری خاوەن دیوارەکە کردیمن، و داوای دووارە بیناکردنی کردیمن، وتی منیش خوەمان پۊیل خەرجەگەی دەیمن.

وتیش؛ هەر جارێ خستیادەی دۊیا، تا ئی کەلەمە کەفت، وتیش؛ خیزانەگە ئی ماڵە لە خود هاوساگە گردنەسە کرا.