کوردەیل هوشداری لە "سەرگەرمی سیاسی" ئەرا چووڵکردن خانەقین لە ئاسایش و پیشمەرگە دەن
شەفەق نیوز/ کورد شار خانەقین، نشان بیزارییان لە بڕیاریگ ئەمنی دان، ئەرا چووڵکردن شارەگە لە هیزەیل کورد، و دووپات کردن ک بڕیارەگە لەبنەمای زانیاریەیلیگ ئەمنی هەڵە وکاریگەری سیاسی هاتیە.
وەگورەی سەرچەوەیگ ئەمنی، ئەرا ئاژانس شەفەق نیوز وت: فەرمانەیلیگ ئەمنی لەلاین دەسەڵاتەیل فیدراڵی هاتیە، وە چووڵکردن بارەگای سریەی فریاکەفتن و هیزەیل پاسەوانی بەنداو ئەڵوەن و پارەگای پیشمەرگە لەناو هوتێل گەشتیاری لەبان چەم ئەڵوەن و چووڵکردن بنکەیل.
سەرچەوەگە دووپات کرد ک دانوسەنین ئەمنی وە ئاست بەرزیگ ئیرنگە کریەێد ئەرا کۆتاییهاوردن وەو چاوەیلە ک لایەنەیلیگ دوژمن وەپی هەڕەشەی وەیەکەوژیان ئاشتەوایی لە خانەقین دەن.
لەلای خوەییش، یەکێتی نیشتمانی کوردستان/ خانەقین، وەگورەی قسەی وەرپرس راگەیاننی ئیبراهیم حەسەن، چووڵکردن خانەقین لە هیزەیل کورد وە بڕیاریگ دادە قەڵەم ک لایەنەیلیگ سیاسی دەسیان هاناوی مینەی ئاژاوە کەن وە هەژمارەیلیگ درووکانی دژوە خانەقین و تەقەلا دەن چز پیکاتەیل و وەیەکەوژیان ئاشتەواییان، وخەڵک خانەقینیش (وەتایبەت کورد) بیەن چوینکە لە گشت ئەو ساڵەیل گوزەشتە دویر لە ململانەی نەتەوەپەرستی و مەزهەوی بوینە.
حەسەن ئەرا ئاژانس شەفەق نیوز وت: هیزەیل ئاسایش بنەمای بەیاننامەیل و زانیاریەل ئەمنی و هەواڵگری لە خانەقین و دەورفردی دیرن ک هویچ هیزیگ ئەمنی لە ساڵ ٢٠٠٣ تا ئیسە نەیرێدەی، و پرسیار کەس ئایا ئەوە شیوەی دانیشتگی و دیموگرافیای ئاڵشت کەێد؟ وەگەرد رەدبوین میژوو و رویداوەیل، هەر وە زۆرینەی کوردستانی مینێد.
هەمیش باس مەترسی "سەرگەرمی سیاسی" کرد ک لەبان خەوەریلیگ هەڵە و زانیاریەل درووکانی ئەرا دروسکردن فیتنە لە خانەقین و شیوانن وەیەکەوژیان کۆمەڵایەتی وە پشتبەسان وە سایتەیل سۆشیال میدیای درووکانی و پویل دریاگ ژیان کەن.
وەرپرس راگەیانن یەکێتی داوای نواگردن هەڵمەتەیل فیتنە و خاوەن هەژمارەیل سیا لەبان سۆشیال میدیا کردن و ئاشکرای دانوسەنین ئەمنی وە ئاست بەرزیگ لەناوبەین سەرکردەیل فیدراڵی و کوردی کرد، ئەرا یەکلاوەکردن ئی باوەتە و رەسین ئەرا لەیەکڕەسینەوە ئەرا خزمەت بەرژەوەنی ئاسایش باڵا.
لەلای خوەییش، موقەدەم جەلیل مام فائق فەرماندەی لیوای سێیەم – میحوەر یەکەم پیشمەرگە وت: بڕیار کیشانەوە و چووڵکردن هیزەیل کورد لە خانە لە بنەمای زانیاریەیلیگ ئەمنی نا هویرد هاتیە، ک ئویشێد گوایە ٦٠٠ – ٧٠٠ ئەندام کورد لە ئاسایش و پۆلیس کوردی لە خانەقین هەس، باوجی شمارەیان لە ١٥٠ کەس زیاتر نیە.
فائق ئەرا ئاژانس شەفەق نیوز وت: فرەی هیزەیل کورد لە خانەقین لە ئاسایش و پۆلیس هەرێمن، و شمارەی هیزەیل پاڵپشتیکردن پیشمەرگە لە ٤٠ کەس زیاتر نییە هانە هوتێل گەشتیاری.
هەرلیوا، ئازاد فائق وەرپرس ئاسایش خانەقین، ڕازی نەوی هویچ قسەیگ ئەمنی لەی باوەتە بکەێد، ئەوەیش لە بنەمای فەرمانەیلیگ لەلایەن وەرپرسەیل ئاسایش کورد.
خانمە پەرلەمانتار سوزان مەنسوور لە پۆستیگ ک هەژمارەیل نزیک لەلی بڵاوی کردن وت: رێک کەفتن لەبان مەنین بارەگایل جویر خوەیان، تا بانگوازیگتر، تا رێککەفتن کۆتایی لەبان مەنینیان وەشیوەیگ هەمیشەیی.
