گەوراپیاگ نەفت هاتە ژێر هێڵ داخواز ژن نوێنەر ئیلامی
شەفەق نیوز- موهەندس بیژەن نامدار زەنگنە، وەزیر کوانەکار نەفت ئێران ک دە ئی کارە دە دنیا خوەێ خاون برەند و شێواز مدیرییەتێگە ئەڕا خوەێ، دۆماێ چەنی چەن ساڵ وادەێ درووکانی ئەڕا هاوردن مودیریەت شرکەت نەفت رووژئاواێ ئێران وە ئیلام، دەستوور دا شرکەت نەفت و گاز ئیلام، بخرێگە کار.
ئی کارە وە خاتر پرسیاره‌یل دوکتور سارا فەلاحی، بییە و زەنگنە وەێ خاترە دەستوور داگە ک شرکەت نەفت و گاز ئیلام، له شرکه‌ت نەفت رووژئاوای ئێران جیاوە ببێگ و وە جیا دامەزرێ.
ئی دەستوورە لە قەرار بچووگە نام بوودجەێ ئمساڵ ئێران و سەقام بگرێگ تا وە پاگیرە کردن و کودداری دە بوودجە وەێ زووەێلە، ئی شرکەتە دە ئیلام دەس وە کار بکەێ.
ئەر وەزیر نەفت جواو خاس و دڵنیاکەرێ وە دۆت نوێنه‌ر ئیلامی نەدیاگا، ئی پرسیارییە دە سەحن پارڵمان ئێران، شوونگیری دکریا ک چوون دۆمادۆماێل دەوڵەتە و زەنگنەیش ها تەما ببێگە کاندیداێ سەرۆک‌کوماری ئێران ک ساڵێ تر دنرێ، هادەێ پارڵمان ئێران ک ها دەس رخنەگرەێل و هماڵەێل سیاسی دەوڵەت، لەق پایەێ وەزیر بکردان و هاتێ ئستیزاح وەزیریش هەم بکردا.
ئیلامییەیلە ئی دەستوور خاسە لە چاو دوکتور سارا فەلاحی دزاننەێ و جواو خاس داین وەزیر وەێ پرسیارییە، فرە ئەڕای نوێنەرەی ئیلام، خاس نیشتگە و رزامەندییەێل فرەیێگ ئەڕاێ هاوردگە.
هەرچەن بان نەوەد لە سەد نەفت رووژئاوای ئێران ها ئیلام و ئیلام سێیمیەکە دە لا مەڵوەنداری نەفت ئێران و دوێیمیەکە دە لا گاز ئێران یانێ چوارم پەنجم دنیاسە، باوجی چوون یەکمجار شرکەت نەفت ئێران و ئنگلیس، نەفت دە نەفت‌شار و خانەقین کردە دی و ئەوساییش کرماشان تەنیاشار رووژئاواێ ئێران بییە، فرە لە شرکەتەێل ناوچەئی ئێران دە کرماشان دامەزریانە و ئی دارێشتە تا ئێسە ماگەسەێ..
