هەولێر ریکارەیل کۆڕۆنا سەختەو کەێد و پەیمان سووکەوەکردنی لە رەمەزان وەمەرجیگ دەێد
شەفەق نیوز/ ئومێد خۆشناو پارێزگار هەولێر راگەیان لە ئمڕوو پەنجشەممەو بڕیارەیل دەسەی باڵای نواگردن ڤایڕۆس کۆڕۆنا لە هەرێم کوردستان کەفتنە ئاست جیوەجیکردن و تا چوار رووژ ئایندە، و پەیمان سووکەوەکردن ریکارەیل دا ئەگەر رێژەی تووشهاتنەکان وە پەتاگە داوەزیا.
خۆشناو لە کۆنگرەیگ رۆژنامەوانی ئاژانس شەفەق نیوز ئامادەی بوی وت: ئمڕوو ژوور ئۆبراسیۆنەیل هەولێر کۆبونەوە ئەرا جیوەجیکردن بڕیارەیل دەسەی باڵای نواگردن کۆڕونا کرد، وتیش: لە کۆبونەوەگە بڕیار جیوەجیکردن بڕیارەیل دەسەگە دریا ک ئەوەسا لە ساعەت هەیشت ئیوارەی ئمڕوو کەفێدە ئاست جیوەجیکردن.
وتیش؛ داوا لە هاووڵاتییەیل پارێزگای هەولێر کردیمن ریکارە مقەیەتیەکان بخەنە وەرچەو وجیوەجییان بکەن تا تووشهاتنەیل کەمەو بوون، وەلێ وەداخەو ک لە بەشیگ لە شوونەیل جیوەجیکردن ریاکرەیل خاس نەوی، باوجی لە چەن شوونیگ وەوجوورە نەوی، ئەراوە بڕیار چەسپانن نیمچە قەیەغەی هاتووچگن دایمن.
پارێزگارەگە داوا لە گشت دانیشتوەیل هەولێر کرد پابەند وە بڕیارەیل دەسەی باڵا بوون ئەرا کەمەوکردن تووسهاتنەیل ڤایرۆسەگە، وتیش: ئیمە لەلاییگ خەم کاسبکارەیل هەڵگریمن، و لەلاییگ تر خەم زیایبوین تووشهاتن ومردنەکان، وەلێ گرنگترین چشت خوەی تەندروسی و سەڵامەتی ھاوڵاتییەیلە.
هەمیش وت: ئومید خوازیمن روی وەرەو ریکارەیلیگ سەختتر نەکەیمن، و دووپات کرد ک ئەوەسا لە ساعەت هەیشت ئیوارە گشت شوونەیل بەسیمن، ئەراوە داوا لە هاووڵاتییەیل کەیمن هاوکارمان بوون.
خۆشناو ئاماژە کرد ک وەگەرد ئاماداکاری ئەرا مانگ رەمەزان ئومید خوازیمن تووشهاتنەیل کەمەو بوون و کۆنتڕۆڵ پەتاگە بکەیمن و دویای ئەوە دەسەی باڵا کۆبونەوە کەێد تا بڕیارەیل تایبەت وە مانگ رەمەزان بوەێد، و دیاری کرد ک کۆبونەوەگە کەفێدە ١٢ی ئی مانگە و ئەو مەوقە ریکارەیل وە گورەی هەڵوێست پەتاگە بوون.
