هەولێر دەسمیەتی کلکەێد.. بار گەورەیگ لە دەرمان ئەرا سوریا وەگەرد قەیران تەندروسی سەختیگ
شەفەق نیوز/ زوهیر قەرات وەڕیەوبەر پەلانسازی و هاوکا ناودەوڵەتی لە وەزارەت تەندروسی سوریا، ئمڕوو شەممە، ئاشکرای کلکردن حکومەت هەولێر پایتەخت هەرێم کوردستان، دەسمیەتی ئەرا سوریا کرد، و وتیش: سیستەم تەندروسی کەمی گەورەیگ لە دەرمان و ئامرازەیل پزشکی وەخوەی دوینێد.
قەرات لە قسەیلی ئەرا ئاژانس شەفەق نیوز وت: سیستەم تەندروسی لە سوریا کەفتیەسە سەختەیل گەورە، وەگەرد کەمەوبوین تیژیگ لە خوازینەیل سەرەکی، جویر کەرەستەیل پزشکی و کادر و سزمەنی و خوەراک ئەرا بیمارەیل و کادرەیل.
قەرات وتیش: ژیرخان تەندروس ویرانکاری دیرێد، وەگەرد کوینەیی ئامرازەیل پزشکی و کەمی لە ئامێرە گرنگەیل ئەرا پیشکەشکردن خزمەت تەندروسی، مڵ زیان بیمارەیل زیایەو بوود، وەتایبەت وەگەرد بەرزەوبوین شمارەی بیماریەیل.
وتیش: پلانیگ فریاکەفتن هەس لە ٣ تا ٦ مانگ وەپی چوود، زوور لەبان دابینکردن خوازینەیل فریاگوزاری سەروکی کەێد، وەگەرد وەردەوامی پیشکەشکردن خزمەتەیل تەندروسی دووانی و سێیانی، وەگەرد گرنگیدان وە سزەمەنی، کارەبا، و کەرەستەیل پزشکی گرنگ.
قەرات وتیش: بەشیگ لە بیمارەیل زیان لە بیماریەیل دەگمەن دیرن، خوازن ئەرا دەیشت سوریا کلیان بکەیمن، بیجگە بەرزەوبوین ئەنفلەوەنزای وەرز زمسان و شووردن گورچگ.
لەباوەت هاوکاری تەندروسی ناوەین سوریا و عراق، قەرات باس وەرگردن بارەیل دەرمان کرد لە هەولێرەو هاتنە، بەشەو کریانە بان دامەزراوەیل تەندروسی.
لە کۆتایی وتیش: وە هەماهەنگی وەرد هاوبەشی ناوخوەیی و ناودەوڵەتی کار کەنر لەوانە ئاژانسەیل نەتەوە یەکگرتگەیل و ریخریاگەیل تەندروسی، ئەرا دابینکردن خوازینەیل سەرەکی و ئاڵشتکردن ئامرازەیل کوینە، وەگەرد نووڕینیگ ئەرا خاسەوکردن خەسەخانەیل و بنکەیل تەندروسی، وەگەرد دروسکردن شوینەیل نوویگ ئەرا دابینکردن شمارەیگ شەوخەف کە وەگەرد بەشەشەوبوین دانیشتگەیل و جویلەی ئاوارەیی وەردەوام بگونجێد.
