هەڵمەت گردەوکردن دەسمیەتی لە هەرێم کوردستان ئەرا زەرەدمەنەیل زەویلەرزەی تورکیا و سوریا.. وینە
حکومەت هەولێر چەن تیمیگ ئەرا وەرگردن دەسمیەتی لە پەخشنەیل دروس کەرد و هەرکە وە چین خوەی دانادە ناو چادرەیل.
سەروە رەسول خانمە وەڕیەوبەرا کووچبردن و قەیران لە هەولێر، ئەرا ئاژانس شەفەق نیوز وت: دویای بڕیار حکومەت هەرێم کوردستان پارێزگای هەولێر دەسکردە هەڵمەتیگ فریاڕەسین و تیمەیلیگ بڵاو کردە چەن شوینیگ لەناو شارەگە، ئەرا وەرگردن دەسمیەتیەیل، ئیجا بردنی ئەرا تورکیا و سوریا تا بیریەێدە دەس زەرەدمەنەیل، وتیش: ماوەی هەڵمەتەگە سنوردار نەکریاگە.
لە سلێمانی، هەڵمەت دەسمیەتی و پاڵپشتیکردن تەندروسی ئەرا کەسوکارەیل قوربانیەیل زەویلەرزە وەیرانکەرەگەی تورکیا و سوریا دەسوەپی کرد.
فەخرەدین قادر وەرپرس دامەزراو پەخشین خێر لەناو کۆنگرەیگ رووژنامەوانی ئاژانس شەفەق نیوز ئامادەی بوی وت: ئەو دەسمیەتیەیلە و هاوخەمیە وەگەرد کەسوکارەیل قوربانیەیل دوو زەویلەرزەی ویرانکەر شەفەق رووژ دووشەممەی گوزەشتە ک هەزاران کورد لەو دوو دەوڵەتە لەناویان بوینە قوربانی، ها پشت دەسکردن وە هەڵمەت تەندروسی گەورە لە ئاست هەرێم کوردستان، ئەرا گردەوکردن و پیشکەشکردن دەسمیەتی تەندروسی وە زەرەدمەنەیل.
لە ئمڕووەو هەڵمەتەگە گردەوکردن دەرمان و کەرەستەیل پزشکی گرێدەو و هەمیش خوەیوەخشەیلیگ لە کادرەیل پزشکی و تەندروسی وەڕی دامەزراو پەخشین لە سلێمانی و کەلار و چەمچەماڵ و راپەڕین و هەولێر و دهۆك و هەڵەبجە.
وەگورەی نووترین ئامار وەلایەن سایت ئاشکرایی بڵاو کریاگە و ئاژانس شەفەق نیوز نووڕیەی، ٢٨٩ مەلیۆن دینار عراقی و ١٢٤ هەزار دۆلار ئەمریکی گردەو کریاگە.
وەگورەی خود ئامارەگە، ٤٢٦ سۆپە، ١٨٠ کەرەستەی خاوەن خوازینە تایبەتەیل، ٢١٥ چادر، ١٣٨٠٠ پارچە لە کەرەستەی پزشکی، ٣٧ بازی مناڵ، ٢٧٣٣٤ کێلوگرام خوەراک، ١١٧٦٧ پەتوو ٩٤٣٥ دڵنگ و پڕتاڵ، ٤٥٤ چشتەیل مناڵ ٢٥٧٢ قوتی و کیسەی شیر گردەو کریاگە.
