هەڵمەت ئاشکراکردن روفاتەیل ئەنفال... نموونەی خوین دەرەیل واز کەن ئەرا ئاشکراکردن چارەنویس هەزاران کەس

شەفەق نیوز/ تیمە تایبەتمەنەیل قۆناغ دویەم گردەوکردن نموونەی خوین خیزانە ئەنفالییەیل قەزای چەمچەماڵ دەسوەپی کرد، وە ئامانج زیایکردن تەقەلایل ئەرا ناسین روفات قوربانیەیل هەڵمەت ئەنفال، کە هەزاران کەس بیتاوانن.

رەمک رەمەزان، سەرۆک شارەوانی قەزای چەمچەماڵ ئەرا ئاژانس شەفەق نیوز وت: "قۆناغ دویەم پرۆسەی وەرگردن نمونەی خوین لە کەسوکار قوربانیەیل ئەنفال لە چەمچەماڵ دەسوەپی کرد"، دووپاتیش کرد کە "تا ماوەی پەنج رووژ وەردەوام بوود".

رەمەزان وتیش: "داواکاری خیزانە ئەنفالییەیل ئەرا دابینکردن نموونە ئەرێنی بویە، کە تیمە تایبەتمەنەیل وەردەوامن لە وەرگردن نموونە وەگورەی توانای خوەیان، بڕیارە لە رووژەیل بانان کارەیل وەردەوام بوون"، وتیش: "دویەکە وەگەرد دەسکردن وە قۆناغ دویەم، وەرگردن 76 نموونە بوی".

لە باوەت قۆناغ یەکەم ئۆپەراسیۆنەگە، رەمەزان وت: “362 کەس لە لیستەیل ئەنفال توومار کریانە، بەڵام تەنیا 205 نموونەی خوین وەرگیریان، ئەوەیش لەوەر نەوین کەسوکار زینی ئەرا بەشیک لە قوربانییەیل، کە وەگورەی پێوەرە ناودەوڵەتییەیل ریژەی کەمیگ لەلی دەرچوود”.

پڕۆسەی گردەوکردن نموونەی خوین گامیگ جەوهەرییە ئەرا ناسین روفات ئەنفالکریایەیل، کە شیکاری دی ئێن ئەی ئەنجام دریەێد تا وەگەرد دی ئێن ئەی ئەو روفاتەیلە لە قەورە وەکۆمەڵەیل دەرکریانە وەرد نموونەی خوین گردەوکریای کەسوکار ئەنفالیەیل بگونجێد، یەیش بەشدارە لە پشتڕاسکردن ناسنامەیان و وەرگردن ئەو ڕێزلینانە کە شایەستەن.

لە دویای رمیان رژیم بەعسەو لە ساڵ 2003، چەن قەورەیگ وەکۆمەڵ لە ناوچە جیاجیایل عراق پەیا کریانر کە روفات هەزاران قوربانی هاناویان کە لە کۆتایی هەشتایەیل سەدەی گوزەشتە لە هەڵمەت ئەنفال کوشیانە،  لە ئەنجامی لایەنە پەیوەندیدارەیل دەس کردنە گردەوکردن نموونەی خوین لە کەسوکار قوربانییەیل و ئەنجامدان وەشکین DNA ئەرا بەراوردکردنیان وەرد نموونەی روفاتەیل، یەیش لە تەقلایگ ئەرا وەدەسهاوردن دادپەروەری و گلەوداین مافە میژووییەیل قوربانییەیل.