هەرێم كوردستان: هویچ ئاوارەیگ لەبان گلەوخواردن ناچار نیەکەیمن وەتایبەت لەو ناوچەیلە کە داعش لەناویان بویە

شەفەق نيوز/ دیندار زێباری هەماهەنگکار تەمەیل ناودەوڵەتی لە حکومەت هەرێم کوردستان، ئمڕوو سێشەممە، دووارەی هەڵوێست حکومەت هەرێم کوردستان کرد لە رازینەوین وە گلەوخواردن زوورکاری ئەرا ئاوارەیی وەرەو ناوچەو شارەیلیان لەناو عراق.

ئەوەیش لە وتاریگ لەناو کۆنگرەی پسپۆڕەیل هەرێمی لەباوەت کەسەیل بیسەروشوین لە خوەرهەڵات ناوڕاس و باکوور ئەفریقا، کە نویەنەرەیل 8 دەوڵەت و شاندەیل دیبلۆماسی ئامادەی بوین.

 زێباری لە وتارەگەی پابەندبوین حکومەت هەرێم کوردستان دووپات کرد لە ئاشکراکردن چارەنویس بیسەروشوینەیل و مسۆگەرکردن سزادان لەبان تاوانەیل سەرنقومکردن.

وتیش: گەل کوردستان بەشە گەورەگە لە تاوانەیل هەڵگرد، هەرلە ئەنفال بەدناو تا رەسێدە تاوانەیل داعش وەبان ئێزدیەیل و ئەو کەمینەیل.

 هەمیش بیسەروشوینی 182,000 مەدەنی لە ئۆپراسیۆنەیل ئەنفال هاوردە یاد، لەناویان 8,000 پیاو لە بارزانییەیل، و باس دراوردن روفات قوربانیەیل لە 75 قەورسان بڕەیی لە گشت شوینەیل عراق کرد، وەگەرد دیاریکردن ناسنامەی 3,659 قوربانی و گلەوداین رەفتاریان، و ئی ریکارەیلە رەنجەیل دامەزراوەیی وەردەوامیگ نشان دەن ئەرا نواگیریکردن میراتی تونوتیژی و رەسانن راسیەگە ئەرا کۆمەڵگایل زەرەدمەن.

 زێباری باس رزگارکردن قوربانیەیل داعش لەلایەن هەرێم کوردستان کرد، لەناو 6,417 رفیان ئێزدیەیل، 3,587 کەس ئازاد کریار و هیمان 2,830 کەس وە بیسەروشوین دریانەسە قەڵەم.

رووشنایی خستە بان کار هاوکاری وەرد تیم لێکۆڵینەوەی نەتەوە یەکگرتگەیل (يونيتاد) کە بویە مدوو هەڵگردن و توومارکردن ئەلیکترۆنی ئەرا زیاتر لە 408,000 لاپەڕە لە پرسەیل لێکۆڵینەوە.

هەڵوێست حکومەت هەرێم کوردستان لە گلەوخواردن ئاوارەیل دیاری کرد کە وت: هویچ ئاوارەیگ لەبان گلەوخواردن ناچار نیەکریەێد، وەتایبەت لەو ناوچەیلە کە وەدەس داعشەو بوینە، دووپات کرد کە گلەوخواردن هوڵیەتی و بیوەی و سەربەرزانە هەر بنەمای سەرەکی لە سیاسەت مرۆیی حکومەت هەرێم کوردستان مینێد.

لە کۆتایی، هەماهەنگکار تەمەیل ناودەوڵەتی داوا لە کۆمەڵگای ناودەوڵەتی کرد ئەرکەیل مرۆیی خوەیان جیوەجی بکەن، و پاڵپشتیکردن پیشەیی و ۆاێیی و لۆجیکی پیشکەش بکەن ئەرا زویکردن وە مینەکردن بیسەروشوینەیل.