هەڵبژاردن عراق لەناو باسکردن دیدارەگەی سەرۆک هەرێم و باڵوێز ئەمریکی
شەفەق نيوز/ نێچیروان بارزانی سەرۆک هەرێم کوردستان، وەگەرد ماسیو تولەر باڵوێز ئەمریکا لە عراق و شاند یاوەری گردەو بۊین.
لە کۆبونەوەگە باس هەڵبژاردن ئەنجومەن نۆێنەرەیل عراق و ئەنجامەیلی، و رەوشەیل عراق وەگشتی، و مەرزەنەیل دۊیارووژ شیوەی سیاسی کریا.
وەگورەی بەیاننامەی سەرۆکایەتی هەرێم کوردستان، هەردوگ لایەنەگە هاوڕا بۊین ک دەنگدانەگە وەشیوەی رێک و بی گیچەڵ وەڕیەو چگ، و گرنگە ک دۊیای واژووکردن لەبان ئەنجامەیلی حکومەتیگ گشتگیر لە عراق دروس بوود ئومید و خوازین هاووڵاتییەلە وەجی بارێد.
لەی باوەتە، باس بەیاننامەی ئەنجومەن ئاسایش ناودەڵەتی کریا ک پشتگیری دەنگدانەگە کرد و وەگام گرنگیگ دانادەی، و هەمیش لە کۆبونەوەگە دەور کۆمسیۆن باڵای سەروەخوەی هەڵبژاردن لە عراق لە جیوەجیکردن دەنگدانەگە وە بەرزی ئەرزشدار کردن، و هەمیش دەور نەتەوە یەکگرتگەیل و یەکێتی ئەوروپا و جامیعەی عەرەبی و گشت ئەو لایەنەیلە ک پاڵپشتی دەنگدانەگە کردن.
سەرۆک نێچیروان بارزانی رووشنایی خستە بان یاسای هەڵبژاردن ک ئەرا یەکەم جارە لە عراق جیوەجی کریا و دووپات کرد ک سەرۆکایەتی هەرێم کوردستان کار ئەرا کۆبوونەوە وەگەرد گشت لایەنە سیاسییەیلەی هەرێم کوردستان کەێد، تا یەکڕزی لایەنە کوردستانییەکان وەدەس بارێد.
پەیوەندیەیل عراق و هەرێم کوردستان وەگەرد ئەمریکا، پەیوەندیەیل هەولێر- بەغداد، تەقەلای عراق ئەرا گونجیان پەیوەندیەیلی وەگەرد دەوڵەتەیل هاوسا و دەوڵەتەیل ناوچەگە، گرنگی تەقەلای چارەسەری گرفتەیل گیرهاتگ ناوبەین هەرێم کوردستان و حکومەت فدڕالی و جیوەجیکردن دەستوور، مەترسی و هەڕەشەیل داعش، رەوشەیل سوریا و نووەوبۊیەیل ئەڤغانستان، باسکردن ئەو کۆبوونەوە بۊین.
