هەڵەبجە.. فیستواڵ ئەنار ٣٠٠ هەزار سەردانکەر کیشێد و داهاتەیل ملیاری وەدەس تیەرێد.. وینە
شەفەق نیوز/ وەڕیەوبەرایەتی گشتی گەشتوگوزاری لە هەڵەبجە، ئمڕوو یەکشەممە، راگەیان کە فیستواڵ ئەنار و پاییز پیشوازی لە زیاتر لە ٣٠٠ هەزار میوان ناوخوەیی و ناودەوڵەتی کرد وەماوەی سێ رووژ، و داهاتەیای لە یەک ملیار و ٤٣٥ ملیۆن دینار عراقی زیاتر بوی.
ئەوەیش لە بەیاننامەیگ رەسیە ئاژانس شەفەق نیوز وە بوونەی کۆتایی ئەو فیستواڵە وە هاوکاری وەرد وەڕیەوبەرایەتی کشتوکاڵی و ریخریاگەیل ناو هەڵەبجە.
بەیاننامەگە دیاری کرد کە ٦٠٠ دوکان ئەرا بەشداریکردن دیاری کریا وەڕی تیرەپشکیگ جیوەجی کریا، دویای پیشکەشکردن نزیکەی دوو هەزار داواکاری بەری پڕۆگرامیگ ئەلیکترۆنی.
ئەو دوکانەیلە، باخەوانەیل و بەرهەمدارەیل ئەنار، و ژنەیلیگ خاوەن کارەیل دەسڕەنگینی، و بفرووشەیل خوەراک کوردەواری وەگەرد دوکانەیل بەرهەم هشکەوکاریاگ و بەرهەمەیل پاییز لە ناوچەگە گردەو.
وەڕیەوبەرایەتیەگە وتیش: فیستواڵەگە وە سەرکەفتگ وەبی رویداوەیلیگ نەخوازیاگ وەڕیەو چگ، و دووپات کرد کە گشت لایەنەیل پەیوەندیدار لە پارێزگای هەڵەبجە وە رەنج دووقاتیگ کار کردن ئەرا سەرکەفتن فیستواڵەگە.
فیستواڵ ئەنار و پاییز ساڵانە لە هەڵەبجە وەڕیەو چوود، ئەرا پاڵپشتیکردن گەشتوگوزاری و پشتگیریکردن بەرهەمەیل کشتوکاڵی و کەلتووری، وەتایبەت ئەنار کە بەریگ سەرەکیە لە شارەگە.
فیستواڵەگە دەرفەتیگە ئەرا کشاورزەیل و خاوەن کارەیل دەسڕەنگینی و خوەراک کەلتوری ئەرا نمایشکردن بەرهەمەیلیان لەوەرچەو مەردمیگ فراوان، کە دەسمیەتی لە گورجکردن ئابووری ناوخوەیی و کیشانن سەردانکەرەیل لە ناو و دەیشت عراق دەێد، وەگەرد قایمکردن هوشیاری لە کەلتوور کورد و کەلەپوور ناوچەگە.
