هوشدارییەیل ژینگەیی لە کوردستان.. گرانی سزەمەنی رخ خەێدە بان دارستانەیل لە زمسان

شەفەق نیوز- سلێمانی

ریخریاگ "ئاینندە" ئەرا پارێزگاری لە ژینگە، رووژ سێشەممە، هوشداری دا لە کەفتن دارستانەیل هەرێم کوردستان لەوەر شەپۆلیگ نوو لە بڕین وەگەرد نزیکەوبۊن وەرزەیل پایز و زمسان، لە سای بەرزەوبۊن نرخەیل سزەمەنی و خراوبۊن دابینکردن کارەبا.

سەرۆک ریخریایەگە مەعروف مەجید، ئەرا پەیامنێر ئاژانس شەفەق نیوز وت، کە "راپۆرتەیل پۆلیس دارستان و ژینگە نیشان دەن ئەرا دەسکرن هاووڵاتییەیل، ماوەی هەردوگ مانگ گوزەشتە، وە بڕین دارەیل لە شمارەیگ لە ناوچە کویەیل، و یەیش نیشانەیگ رخبارە لە بان دارستانەیل هەرێم، کە وە راسی رووبەرەیل فراوانیگ لە داپووشەر رووەکییەی لەدەس داگە ماوەی ساڵەیل گوزەشتە وە مدوو ئاگرەیل و هشکەساڵی و ئاڵشتکارییەیل کەشوهەوا بیجگە لە هوکارەیل تر".

هەمیش وت کە "بەرزەوبۊن نرخەیل سزەمەنی و خراوبۊن رەوش کارەبا بارەیل لەبان دانیشتگەیل ناوچە کویەیل زیاتر کەن، وە تایبەت وەگەرد نزیکەوبۊن زمسان"، دیاری کرد کە "نرخ بەرمیل نەفت کە ئەرا گەرمەوکردن وەکارتیەێد، و بڕ 200 لترە، لە نزیکەی 250 هەزار دینار ماوەی تاوسان بەرزەو بۊە تا ئیرەنگە لە 300 هەزار دینار نزیکەو بوود".

مەجید لە قسەیلی  وتیش کە ریخریایەگە "چەن جار داوا لە حکومەت هەرێم کوردستان و وەزارەت سامانە سروشتییەیل کردگە وە دابینکردن هەوەجەیل ناوچە کویەیل لە سزەمەنی وە نرخەیل گونجیاگ وەرجە هاتن زمسان، ئەرا ریگریکردن لە ناچاربۊن دانیشتگەیل ئەرا پەنابردن وە بڕین دارەیل و وەکارهاوردنیان لە گەرمەوکردن"، هوشداری دا لەوە کە "شایەت دارستانە سروشتی و چنریاگەیل ئی ساڵە بکەفنە وەر رخەیل گەوراتریگ ئەگەر رێکارەیل زویوەزوی نەگیریەێدە وەر".

وەپای مەجید، "دانیشتگەیل ناوچە کویەیل ماوەی وەرزەیل پایز و زمسان و بەشیگ لە وەهار هەوەجەیان وە نزیکەی دە بەرمیل لە نەفت هەس، قەوارەی هەر یەکیگیان 200 لترە، ئەرا هەوەجەیل گەرمەوکردن، لە وەختیگ ناوچەیل تر لە هەرێمەگە هەوەجەیان وە زیاتر لە سێ بەرمیل هەس، وە مدوو ئەو ئاڵشتکارییەیلە کە هاتنەسە بان کەشوهەوا و داوەزیان پلەیل گەرما".

دیاری کرد کە "ئاڵشتکاری کەشوهەوا و هشکەساڵی و ئاگرەیل و بڕین دارەیل و دەسدریژییە جیاجیاگەیل لەبان زەوییەیل و دارستانەیل بۊنە مدوو کەمەوبوین ژینگە سروشتییەگە لە کوردستان"، دیاری کرد کە "فرەیگ لە دەوڵەتەیل رێکارەیل وەردەمگرنە وەر ئەرا رۊوەڕۊبۊنەگە وەرد لیکەفتەیل ئاڵشتکاری کەشوهەوا، لە وەختیگ هێمان چارەسەرە ناوخوەییەیل لە خوار ئاست ئەو رخەیلەس کە رۊوەڕۊ ژینگە بوونەو".

سەرۆک ریخریاگ "ئاینندە" ئاشکرا کرد، کە "ئامارەیل ریخریایەگە نیشان دەن زیاتر لە یەک ملیۆن دۆنم لە دارستانەیل و لەوەڕگەیل لە هەرێم کوردستان ماوەی ساڵەیل 2010 و 2021 سزیانە"، و دیاری کرد کە "هەمیش دارستانەیل رۊوەڕۊ پیشێلکارییەیل فرەیگ بۊنەسەو، لەناویانیش بڕین دارەیل و سزانن و شیوانن زەوییەیل و دروسکردن باڵەخانەیل و پرۆژەیل و ریەیل و دامەزراوەیل وە شیوەیگ کاریگەری لەبان روبەرەیل فراوانیگ لە داپووشەر رووەکی و ژینگە سروشتییەیل کردگە".

مەجید داوا لە وەزارەت کشاوەرزی و دەسەی پارێزگاری و خاسەوکردن ژینگە و لایەنە حکومەتییەیل و ریخریاگو تایبەتمەنەیل کرد ئەرا "دانان پلانیگ هاوبەش ئەرا پارێزگاری لە سامان سروشتی، و دابینکردن سزەمەنی ئەرا دانیشتگەیل ناوچە کویەیل وە نرخەیل گونجیاگ دۊر لە نرخە بازرگانییەیل"، هوشداری دا لەوە کە "لە وەردەوامبۊن رەوش ئیرەنگە،  روبەرەیل فراوانیگ لە دارستانەیل کوردستان شایەت ماوەی ساڵەیل ئایەندە دیار نەمنن، وەجۊریگ ناوچەگە گلەو دەێدەو ئەرا رەوشەیل نەوەتەیل سەدەی گوزەشتە، هەنای دانیشتگەیل ناچار بۊن پشت وە دارەیل بوەسن ئەرا گەرمەوکردن".